პოლონური კონსერვატიული პარტია „კანონი და სამართლიანობის“ წევრ ევროპარლამენტარს, დომინიკ ტარჩინსკის დიდ ბრიტანეთში შესვლაზე უარი უთხრეს, სადაც ის პატრიოტულ მარშში მონაწილეობას აპირებდა. ამის შესახებ პოლონური მედია წერს.
დომინიკ ტარჩინსკიმ სოციალურ ქსელებში განაცხადა, რომ მას უარი უთხრეს დიდ ბრიტანეთში შესვლაზე, სადაც ღონისძიება Unite The Kingdom March-ზე სიტყვით უნდა გამოსულიყო.
ევროდეპუტატმა გამოაქვეყნა ბრიტანეთის ხელისუფლებასთან მისი მიმოწერა, რომლის მიხედვითაც უარის მიზეზი გახდა ის, რომ დიდ ბრიტანთში მისი ჩასვლა „საზოგადოებრივი კეთილდღეობას“ არ შეუწყობდა ხელს.
ცნობისთვის, Unite The Kingdom March არის ანტიიმიგრაციული მარში, რომელიც ულტრამემარჯვენე აქტივისტის, ტომი რობინსონის მიერ არის ორგანიზებული.
ტარჩინსკი ადრეაც მონაწილეობდა მსგავს ღონისძიებებში და მხარს უჭერდა მათ ორგანიზატორებს.
ევროდეპუტატი დიდი ბრიტანეთის მთავრობის აკრძალვის გასაჩივრებას აპირებს. ტარჩინსკის თქმით, ის სასამართლოში უჩივლებს ბრიტანეთის პრემიერ-მინისტრ კირ სტარმერს.
ამ საქმეს გამოეხმაურა პოლონეთის ვიცე-პრემიერი და საგარეო საქმეთა მინისტრი რადოსალვ სიკორსკიც.
„სწორედ ბრიტანეთის ხელისუფლებამ მიიჩნია ბატონი ევროპარლამენტარი საზოგადოებრივი წესრიგისთვის საფრთხედ. ვურჩევდი, რომ საჯარო განცხადებებში მეტი თავშეკავება გამოიჩინოს და შესაძლოა, ნაკლები რადიკალიზმი“, – დაწერა სიკორსკიმ.
პოლონეთის საგარეო უწყების ხელმძღვანელის ამ განცხადებას კომენტარი მოჰუვა „კანონისა და სამართლიანობის“ პარტიაში. დეპუტატ პავლ იაბლონსკის თქმით, მას უფრო მეტად სიკორსკის რეაქცია გაუკვირდა, ვიდრე ლონდონის გადაწყვეტილება ტარჩინსკის მიმართ.
„თუ ადამიანს, რომელსაც მემარჯვენე შეხედულებები აქვს, რომელიმე ქვეყანაში შესვლაზე უარს ეუბნებიან, ხომ არ გვაქვს საქმე ტოტალიტარიზმთან? მიკვირს ბატონი სიკორსკის რეაქცია. როგორც პოლონეთის საგარეო საქმეთა მინისტრის, მისი მოვალეობაა პოლონელი მოქალაქის დაცვა. მე სეიმის დეპუტატი ვარ. ახლა ვფიქრობ, თუ დიდ ბრიტანეთში ჩავალ და მე ღიად ვამბობ, რომ არალეგალური იმიგრაციის წინააღმდეგი ვარ, იქნებ ჩემი დაკავებაც სცადონ. პოლონეთის საგარეო საქმეთა სამინისტროს ჩარევას მოვითხოვ“, – თქვა იაბლონსკიმ.
მსგავსი განცხადებით გამოეხმაურა ამ საქმეს პოლონეთის პრეზიდენტის საერთაშორისო პოლიტიკის ბიუროს ხელმძღვანელი მარცინ პშიდაჩიც.
„პოლონეთის მინისტრი ვალდებულია, პოლონელი მოქალაქის მხარეს დადგეს. მიუხედავად მისი შეხედულებებისა! ამ პასპორტზე, რომელსაც პატივი არ სცეს, თეთრი არწივია გამოსახული, ბატონო მინისტრო“, – დაწერა პლატფორმა იქსზე პშიდაჩმა.
მან ასევე აღნიშნა, რომ დღეს პრობლემა პოლიტიკოსს ეხება, მაგრამ ხვალ შესაძლოა, პოლონეთის ნებისმიერ მოქალაქეს შეეხოს.
შეგახსენებთ, რომ დიდი ბრიტანეთის საგარეო საქმეთა სამინისტრომ ქვეყანაში შესვლა აუკრძალა იმ პირებს, რომლებიც 16 მაისს ლონდონის ცენტრში დაგეგმილ ულტრამემარჯვენეთა მიტინგში მონაწილეობას აპირებენ. პრემიერ-მინისტრმა, კირ სტარმერმა განაცხადა, რომ მთავრობა დაბლოკავს „ულტრამემარჯვენე აგიტატორებს“, რომლებიც 16 მაისს დაგეგმილ ღონისძიებაში მონაწილეობას გეგმავენ.
16 მაისის მარშის ორგანიზატორი ტომი რობინსონი ცნობილი გახდა თავისი ანტიიმიგრაციული და ანტიისლამური საქმიანობით. მისი განცხადებები და ქმედებები არაერთხელ გახდა დავის საგანი როგორც დიდ ბრიტანეთში, ისე მის ფარგლებს გარეთ. იგი არაერთხელ დააკავეს და გაასამართლეს სხვადასხვა დანაშაულისთვის, მათ შორის საზოგადოებრივი წესრიგის დარღვევის, თავდასხმისა და სასამართლოს შეურაცხყოფისთვის.
იმიგრაცია გასულ წელს დიდ ბრიტანეთში მთავარ პოლიტიკურ თემად იქცა და ეკონომიკური პრობლემების მიმართ შეშფოთებაც კი გადაფარა, რადგანაც ქვეყანაში თავშესაფრის მაძიებელთა რეკორდული რაოდენობა დაფიქსირდა.