პარლამენტში ჟურნალისტების აკრედიტაციის ახალი წესის შემოღების ინიციატივას მიესალმება „ხალხის ძალის“ აღმასრულებელი მდივანი გურამ მაჭარაშვილი. როგორც დეპუტატმა ჟურნალისტებთან საუბრისას განაცხადა, დეპუტატს პარლამენტში უნდა ჰქონდეს ნორმალური საქმიანობის საშუალება და ჟურნალისტების მხრიდან კითხვებზე პასუხის მისაღებად მათ წინააღმდეგ გამოყენებული დერეფნებში დევნის ფორმა, დაუშვებელი და მიუღებელია.
„ჩვენ ჯერ კიდევ „ქართული ოცნების“ რიგებში ყოფნისას და მოგვიანებით „ხალხის ძალის“ შექმნის შემდეგ, ვითხოვდით ევროპაში არსებული რეგულაციების საქართველოს პარლამენტში შემოღებას. დამისახელეთ რომელიმე დემოკრატიული ქვეყანა, ან მაჩვენეთ შემთხვევა, როცა ჟურნალისტი ლიფტში ან კაბინეტში უვარდება დეპუტატს, ან დერეფანში მისდევს და სურს სულელურ შეკითხვაზე პასუხის ძალით მიღება. აზრის გამოხატვის თავისუფლება აქვს ყველას – მათ აქვთ ტელევიზიები, დასხდნენ იქ და რაც უნდათ ის აკეთონ.
პარლამენტში მედიისთვის არის რამდენიმე ადგილი (არა ერთი, არამედ რამდენიმე), სადაც დეპუტატი მიდის და პასუხობს მედიის კითხვებს. მაგრამ, თუ დეპუტატი არ მიდის კითხვებზე საპასუხოდ, პროფესიონალი ჟურნალისტი თუ ხარ, შეგიძლია გააკრიტიკო ამის გამო და თქვა, რომ კითხვებს არ უპასუხა, მაგრამ ამ ტიპის ჟურნალისტებს სწორედ იმაზე აქვთ აწყობილი დღის წესრიგი, როგორმე გააბრაზონ დეპუტატი და წყობილებიდან გამოიყვანონ.
ასე რომ, მივესალმებით ამ გადაწყვეტილებას, რადგან, დეპუტატს, როცა მიდის პარლამენტში, უნდა ჰქონდეს სამუშაო გარემო და არ უნდა დასდევდეს ჟურნალისტი – ლამისაა საპირფარეშოებში შეუვარდნენ დეპუტატებს. მითხარით, რომელ ქვეყანაში ხდება მსგავსი რამ?“ – განაცხადა გურამ მაჭარაშვილმა.