ამ აგენტურაზე ძალიან დიდი ფულია დახარჯული და ცდილობენ, რომ ის ჩადებული კაპიტალი იქნებ როგორღაც გამოიყენონ, დამატებით ჟანგბადი მისცენ ამ კვდომაში წასულ ოპოზიციას და როგორღაც გამოიყენონ თავიანთი აგენტურა, – განაცხადა საპარლამენტო უმრავლესობის წევრმა გიორგი სოსიაშვილმა გადაცემაში „დღის ქრონიკა“ ოპოზიციაზე და ევრობიუროკრატებზე საუბრისას.
მისივე თქმით, საზოგადოებას მარტივად აეხილა თვალი ამ ყველაფერზე, განსხვავებით წინა წლებისგან, როდესაც აგენტურა მართავდა ქვეყანას.
„ამ პროექტებით შეფუთული თანხა ხმარდებოდა ქვეყანაში საზოგადოებრივი აზრის „ფორმირებას“ და მათთვის სასურველი აგენტურის მიერ ქვეყნის მართვას. საზოგადოებრივი აზრი უნდა ყოფილიყო ისე, როგორც მათი სურვილი იქნებოდა. ახლაც აქვთ ამის მცდელობა. ერთადერთ მათი გზა, რომ როგორღაც ეს აგენტურა გადაარჩინონ, არის სანქციების დაწესება, ახალი რეზოლუციების გამოცხობა.
ჩვენ ვნახეთ ეუთო/ოდირის დასკვნა, რომელიც ამბობდა, რომ ყველაფერი წესრიგში იყო არჩევნებთან დაკავშირებით, რამდენიმე ხნის შემდეგ ეუთოს საპარლამენტო ასამბლეამ მიიღო რეზოლუცია, სადაც რაღაც სისულელეები ჩაიწერა. ჩაიწერა იმ „დიფ სთეითის“ კარნახით, რომელმაც თავის დროზე ყველა ინსტიტუცია მოიცვა“, – აღნიშნა გიორგი სოსიაშვილმა.