ტექნოლოგიური მაგნატი ილონ მასკი აშშ-ის პრეზიდენტის, დონალდ ტრამპის ადმინისტრაციას ოფიციალური მრჩევლის სტატუსით უბრუნდება. ამის შესახებ Euronews-ი იუწყება.
გამოცემის ცნობით, იგი სათავეში ჩაუდგება მასშტაბურ ინიციატივას, რომელსაც პენტაგონში „მომავლის ომების კვლევას“ უწოდებენ.
2024 წელს მასკმა მხარი ღიად დაუჭირა ტრამპს და მნიშვნელოვანი როლი შეასრულა მის თეთრ სახლში დაბრუნებაში. ამის შემდეგ იგი სათავეში ჩაუდგა მთავრობის ეფექტიანობის დეპარტამენტს (DOGE) და აშშ-ის ფედერალურ უწყებებში მასშტაბური საკადრო შემცირებები გაატარა. DOGE-ის ხელმძღვანელის პოსტი მან 2025 წლის მაისში დატოვა.
ოთხშაბათს, კვანტიკოს სამხედრო ბაზაზე გამოსვლისას, აშშ-ის თავდაცვის მინისტრმა პიტ ჰეგსეთმა განაცხადა, რომ ახალი ინიციატივა — Project Meridian — „ამერიკის საუკეთესო გონებათა გაერთიანება იქნება, რომლის მიზანიც მომავალი ომების წარმოების თავისებურებების შესწავლაა“.
„ჩვენ ავამოქმედებთ ამერიკული უპირატესობის იმ უნიკალურ რესურსს, რაც ჩვენს მოწინააღმდეგეებს არ გააჩნიათ — ესენი არიან ჩვენი ინოვატორები, წამყვანი ხელმძღვანელები და ტექნოლოგები“, — აღნიშნა ჰეგსეთმა.
Project Meridian-ს ილონ მასკთან ერთად კიდევ ორი თანათავმჯდომარე ეყოლება: თავდაცვითი ტექნოლოგიების კომპანია Anduril Industries-ის 34 წლის თანადამფუძნებელი პალმერ ლაკი და წარმომადგენელთა პალატის 83 წლის ყოფილი სპიკერი, რესპუბლიკელი ნიუტ გინგრიჩი.
პენტაგონის ხელმძღვანელის განმარტებით, პროექტის მიზანია შემოქმედებითად შეხედოს მომავალს და განსაზღვროს ის სფეროები თუ შესაძლებლობები, სადაც აშშ-მა აბსოლუტურ უპირატესობას უნდა მიაღწიოს.
ინიციატივაში ჩაერთვებიან კერძო სექტორის წარმომადგენლები, ინოვაციების სფეროს ლიდერები, აკადემიური წრეები და პოლიტიკის ექსპერტები. ჰეგსეთის განცხადებით, Project Meridian-ის მუშაობის საბოლოო შედეგები და რეკომენდაციები 120 დღის ვადაში მომზადდება და წარედგინება საზოგადოებას.