ძალიან დიდი ტკივილია 26 წლის ვაჟკაცის დაკარგვა მთელი საქართველოსთვის – ამის შესახებ ავღანეთში დაღუპული ქართველი ჯარისკაცის მდინარი ბებიაშვილის ჩამოსვენების ცერემონიაზე ჟურნალისტებს პრემიერ-მინისტრმა გიორგი კვირიკაშვილმა განუცხადა.
„ძალიან დიდი ტკივილია 26 წლის ვაჟკაცის დაკარგვა მთელი საქართველოსთვის. მინდა, მივუსამძიმრო პირველ რიგში, მის ოჯახსა და ახლობლებს, ასევე, მივუსამძიმრო მთელს ქვეყანას. საქართველო მისი ნათელი მომავლისთვის დაღუპულ გმირებს არ დაივიწყებს“ – განაცხადა პრემიერმა.
ავღანეთში თავდასხმის შედეგად დაღუპული ქართველი სამხედროს, უმცროსი სერჟანტის მდინარი ბებიაშვილის ცხედარი აშშ-ის საჰაერო ძალების სამხედრო თვითმფრინავით, სპეციალური რეისით ბაგრამის საავიაციო ბაზიდან საქართველოში ცოტა ხნის წინ ჩამოასვენეს. ცხედარს ჯერ ექსპერტიზაზე, მოგვიანებით კი, ზესტაფონის რაიონში, მშობლიურ სოფელში გადაასვენებენ. მისივე თქმით, დაკრძალვის ცერემონია 10 აგვისტოს გაიმართება.