გუშინ ჭონქაძის ქუჩაზე 47 წლის კახა ძნელაძე ცეცხლსასროლი იარაღიდან მოკლეს. როგორც თვითმხილველები აცხადებენ, მკვლელი მოტოციკლით გადაადგილდებოდა და მას შემდეგ, რაც ძნელაძის მისამართით გაისროლა, ადგილიდან მიიმალა.
მკვლელობა გუშინ დღის საათებში ჭონქაძის ქუჩაზე მდებარე პარკთან მოხდა, სადაც დამონტაჟებულია სათვალთვალო კამერები, დიდი ალბათობით, მომხდარი კამერებმა გადაიღეს.
„ნიუპოსტმა“ ოჯახის ახლობლებთან საუბრისას გაარკვია, რომ სამართალდამცავები შესაძლოა სავარუდო ეჭვმიტანილზე გარკვეულ ინფორმაციას უკვე ფლობდნენ.
რაც შეეხება გარდაცვლილს – „ნიუპოსტის“ ინფორმაციით, კახა ძნელაძეს მჭიდრო კავშირი ჰქონდა კრიმინალურ სამყაროსთან. ასევე, ჩვენთვის ცნობილი გახდა, რომ მკვლელობამდე გარკვეული დროით ადრე გარდაცვლილსა და მკვლელს შორის ურთიერთშელაპარაკებას და გაურკვევლობას ჰქონდა ადგილი, შესაძლოა, მკვლელობის მოტივი სწორედ აღნიშნული გამხდარიყო.
1993 წელს კახა ძნელაძეს 18 წლის ძმა მოუკლეს. ეს იყო გახმაურებული მკვლელობა თბილისში – სამართალდამცავებმა საზოგადოებრივ ტრანსპორტში ორი გარდაცვლილი ბიჭის ცხედარი იპოვეს, ერთ-ერთი ვახო ძნელაძე გახლდათ.
ასევე, ცნობილია რომ ძნელაძეს ჰყავს და, რომელიც ე.წ. კანონიერი ქურდის, ვაჟა ბიგანიშვილის მეუღლეა, რომელიც ამ დროისთვის მოსკოვში ცხოვრობს.
მომხდარზე გამოძიება საქართველოს სისხლის სამართლის კოდექსის 108-ე და 236-ე მუხლებით მიმდინარეობს, რაც განზრახ მკვლელობასა და იარაღის უკანონო ტარებას გულისხმობს.
ნიუპოსტი