დავით ქაცარავა შსს-ს ბორჯომის რაიონულ სამმართველოში გამოკითხვაზე დაიბარეს

სამოქალაქო აქტივისტი დავით ქაცარავა ბორჯომის რაიონის პოლიციის განყოფილებაში გამოკითხვაზე დაიბარეს. სამართალდამცველები ამ წუთებში ბორჯომის ტყეში აღმოჩენილ კიდევ ერთ, შესაძლო ნივთმტკიცებასაც ამოწმებენ.
შეგახსენებთ, რომ ქაცარავამ, რომელიც სტიქიური უბედურების ზონაში უკვე რამდენიმე დღეა, მოხალისედ იმყოფება, დღეს ბოთლის ნამსხვრევები იპოვა, რომელსაც საწვავის სუნი აქვს.
“საქეიფო ადგილი ნამდვილად არ არის, ვინც მეტყვის, რომ საქეიფო ადგილია, მას მე თვითონ დავპატიჟებ აქ საქეიფოდ. ამ ბოთლის ნატეხებს უცნაური სპეციფიკური სუნი ჰქონდა, ანუ ამ ნატეხებს არ ჰქონდათ ღვინის სუნი, არც რაიმე სხვა. სანამ ექსპერტიზა არ იტყვის ამაზე თავის საბოლოო პასუხს, რაიმეზე საუბარი რთულია, თუმცა ჩემი პირადი სუბიექტური აზრია, დიახ, ადგილი აქვს დივერსიას, მასშტაბურ დივერსიას,“ – განაცხადა ქაცარავამ.
ამ დროისთვის სამართალდამცველები ბორჯომისა და ლიკანის სასტუმროებში მყოფი ტურისტების სიას და მათ პირად მონაცემებს ამოწმებენ. ძალოვანი უწყებები განსაკუთრებით მას შემდეგ გააქტიურდნენ, რაც ტყეში, გუშინ დილით, ბენზინის ავზი იპოვეს.