აბასთუმნის ტყეში ჩვენ პოზიტიური დინამიკა გვაქვს და ცეცხლის ყველა ღია კერა ჩამქრალია, – ამის შესახებ შინაგან საქმეთა მინისტრმა, გიორგი მღებრიშვილმა ჟურნალისტებთან საუბრისას განაცხადა.
მინისტრის ინფორმაციით, მეხანძრე-მაშველები ავიაციასთან ერთად ეფექტურად მუშაობენ და იმ შემთხვევაში, თუ ამინდი შეუწყობს ხელს, ხანძარი დღის ბოლოს უკვე ლოკალიზებული იქნება.
“შეიძლება ითქვას, რომ ცეცხლის ყველა ღია კერა ჩამქრალია. ეფექტურად მუშაობს ავიაცია და ცოცხალი ძალა. სრულად გვაქვს აწყობილი კავშირგაბმულობა. ვერტმფრენებს კონკრეტულ კოორდინატებს აძლევენ, თუ სად უნდა დაესხას წყალი. დღის ბოლომდე, თუკი ამინდი შეგვიწყობს ხელს, ხანძარი ფაქტობრივად ლოკალიზებული იქნება”, – განაცხადა გიორგი მღებრიშვილმა.
მინისტრის ინფორმაციით, ამ დროისთვის 300-მეტრამდე გზა არის გაჭრილი, რისი საშუალებითაც სახანძროები შევიდნენ ხანძრის კერებთან და მიმდინარეობს მათი დამუშავება.
ამასთან, მინისტრმა აღნიშნა, რომ სახანძრო სამუშაოებში ჩართული პირები, ასევე ტექნიკა, უზრუნველყოფილი არიან საკვებითა და საწვავით.