ცენტრალური საარჩევნო კომისია “რუსთავი 2”-ის ჟურნალისტის წინააღმდეგ სასამართლოს მიმართავს, – ამის შესახებ ცენტრალური საარჩევნო კომისიის თავმჯდომარის მოადგილემ გიორგი შარაბიძემ დღეს გამართულ ბრიფინგზე განაცხადა.
როგორც შარაბიძემ აღნიშნა, გუშინ “რუსთავი 2”-ის ეთერში გავიდა სიუჟეტი, რომელიც ცესკოს საარჩევნო შესყიდვებს ეხებოდა, რაც არსებით ფაქტობრივ უზუსტობას შეიცავდა.
“გუშინ 9 საათიან კურიერში გავიდა ჟურნალისტ ეკო მაღრაძის მიერ მომზადებული სიუჟეტი ცესკოს საარჩევნო შესყიდვებთან დაკავშირებით, რომელიც შეიცავდა არსებით ფაქტობრივ უზუსტობებს. კონკრეტულად სიუჟეტში მტკიცებით ფორმაში გაცხადდა, რომ ცესკო ტენდერებს ფაქტობრივად აღარ ატარებს და მომსახურებას ყიდულობს იმ კომპანიებისგან, რომელსაც ხელმძღვანელობა თავად არჩევს. რაც მცდარია, ვინაიდან შესყიდვებისთვის ხდება ფასთა წინასწარი კოდირებები, ასევე ხდება შესასყიდი პროდუქციის შესწავლა წარმოდგენილი ნიმუშების მიხედვით. სულ 2017 წლის მანძილზე საარჩევნო პერიოდში 76 ტენდერი გამოცხადდა, რომელთაგანაც არ შედგა 26 ტენდერი. მათ შორის 2-ჯერ გამოცხადების შემდგომ 6 ტენდერი. ხოლო წარმოქმნილი ეკონომია შეადგენს 177 ათას ლარს. რაც შეეხება საარჩევნო პერიოდის შესყიდვებს, იგი ხორციელდება კონკრეტული წლის საარჩევნო ბიუჯეტიდან და საარჩევნო კოდექსის 52-ე მუხლის მე-6 პუნქტის მიხედვით ცესკო უფლებამოსილია განახორციელოს ასეთი შესყიდვები გამომდინარე საარჩევნო პროცესების მნიშვნელობიდან და შესაბამისი ვადებიდან. საარჩევნო პერიოდში განხორციელებული შესყიდვების კანონიერება აბსოლუტურად ეჭვგარეშეა. აღსანიშნავია, რომ სიუჟეტში ჟურნალისტმა დაასახელა შესყიდვების კოდების დასახელებები და არა ის, თუ რა იქნა რეალურად შესყიდული. მაგალითად, საბიუჯეტო სპეციფიკიდან გამომდინარე, კოდს ჰქვია საოფისე მანქანა-დანადგარები, აღჭურვილობა და საკანცელარიო ნივთები, თუმცა რეალურად შესყიდულია საარჩევნო უბნებზე ბიულეტენების კონვერტები, ხოლო სახელმწიფო კონსოლიდირებული ტენდერის ფარგლებში A-4 ზომის ქაღალდი, რომლითაც მარაგდება ცესკო, საოლქო-საარჩევნო კომისიები, ცესკოს სტამბა, საარჩევნო დოკუმენტაციის, მათ შორის, ამომრჩეველთა კედლის სიების დასაბეჭდად. შესყიდვების ყველა ხელშეკრულება საჯაროდ ხცელმისაწვდომია და საკითხით დაინტერესებულ ნებისმიერ პირს, მითუმეტეს, სიუჟეტის ავტორს შეეძლო ენახა. რაც ყველაზე სამწუხაროა, სიუჟეტის ბოლოს ჟურნალისტმა დაასახელა აბსოლუტურად მცდარი თანხა. ნაცვლად საკომუნიკაციო სტრატეგიისა სარეკლამო კომპანიის კონცეფციის შექმნისთვის გადახდილი 77 974 ლარისა, დასახელდა 793 000 ლარი როგორც დახარჯული კვლევებსა და სტრატეგიაში ანუ ათჯერ ნაკლები თანხა თან სულ სხვა მიზნობრიობით. შესაბამისად, საარჩევნო ადმინისტრაციას მიაჩნია, რომ სიუჟეტი შეიცავდა მცდარ ინფორმაციას, რომელიც აზიანებს საარჩევნო ადმინისტრაციის იმიჯს და ზოგადად საარჩევნო გარემოს. აქედან გამომდინარე, ცესკო ჟურნალისტის წინააღმდეგ მიმართავს სასამართლოს, რათა მას დაევალოს სიუჟეტში აღნიშნული არასწორი ფაქტების საჯაროდ უარყოფა”, – განაცხადა გიორგი შარაბიძემ.