ჩვენ მოვისმინეთ სახალხო დამცველისგან კრიტიკა, – ამის შესახებ ე.წ. ციანიდის საქმის ერთ-ერთმა პროკურორმა ზვიად გუბელაძემ „პალიტრანიუსის“ გადაცემაში „360 გრადუსი“ განაცხადა.
ზვიად გუბელაძემ სახალხო დამცველს ნეიტრალურობა დაუწუნა და აღნიშნა, რომ საქმის მასალების გაცნობამდეც კი ის დაცვის მხარის მხარდამჭერ განცხადებებს აკეთებდა.
„იმისათვის, რომ შეფასდეს რამდენად ობიექტური და ნეიტრალურია სახალხო დამცველის დღევანდელი განცხადება, უმჯობესი იქნება ვთქვათ, თუ როგორ მოხდა სახალხო დამცველის ჩართვა ამ საქმეში და რა განცხადებებს აკეთებდა ის.
გიორგი მამალაძის დაკავებისთანავე სახალხო დამცველმა ისე, რომ სისხლის სამართლის საქმესთან არც შეხება ჰქონდა და არ იცნობდა მას, დაცვის მხარის მხარდამჭერი განცხადებები გააკეთა და აქტიური კომუნიკაცია ჰქონდა პრესისა და ტელევიზიის წარმომადგენლებთან.
მის განცხადებებში გარკვეული ტენდენცია შეინიშნებოდა, ყველაზე ცუდი და მოულოდნელი ჩემთვის იყო ის, რომ სახალხო დამცველმა ტყუილიც კი იკადრა, როდესაც 27 თებერვალს პარლამენტში იმყოფებოდა და ჩვენმა წარმომადგენელმა მიმართა, რომ სანამ განცხადებებს გააკეთებდა, უმჯობესი იქნებოდა, გაცნობოდა სისხლის სამართლის საქმის მასალებს.
ამ სხდომაზე სახალხო დამცველმა განაცხადა, რომ მას თითქოს გამოთხოვილი ჰქონდა პროკურატურიდან მასალები და კარგად იცნობდა. მე ვარ ამ საქმის პროკურორი და გულწრფელად რომ გითხრათ, სახალხო დამცველისთვის 27 თებერვლის მდგომარეობით არ გვქონდა სისხლის სამართლის საქმის მასალები მიწოდებული, რადგან მან მხოლოდ 28 თებერვალს მოგვმართა განცხადებით და ეს წერილობით დადასტურებულია“, – განაცხადა ზვიად გუბელაძემ.