მიღებულია გადაწყვეტილება, რითაც ვერეს ხეობაში ადამიანის ცხოვრება დაუშვებელი იქნება, – ამის შესახებ თბილისის მერის მოადგილემ, ირაკლი ლექვინაძემ გადაცემა 2030-ში სტუმრობისას განაცხადა.
“ვერეს ხეობაში არ იქნება საცხოვრებელი კორპუსები, რადგან, როგორც სპეციალისტები ამბობენ, ეს ხეობა სარეკრეაციო ზონა უნდა იყოს. სარეკრეაციო ზონა იქნება ასევე, სვანიძის ქუჩის იმ ნაწილში, სადაც სახლები დიანგრა. ერთი ნაგებობა, რომელიც სვანიძის ქუჩის მიმდებარედ დარჩება, თსუ-ს კვლევითი ლაბორატორიაა, რომელიც იქ დიდი ხანია არსებობს და რომლის დანიშნულება ვერეს ხეობის შესწავლა და წყლის დონეების გაზომვაა. ვერეს ხეობაში მიმდინარეობს ისეთი ჰიდრო-საინჟინრო ნაგებობების განთავსება, რამაც წყალმოვარდნების თუ სხვა პროცესების რისკები უნდა შეამციროს. მიმდინარეობს ცხაურების მშენებლობა, რაც მდინარის მიერ ჩამოტანილი ხე-ტყის შეჩერებას განახორციელებს”, – განაცხადა თბილისის მერის მოადგილემ.
მისი თქმით, სტიქიით დაზარალებულ ზონაში ძალიან ბევრი აღდგენითი სამუშაო ჩატარდა და ინფრასტრუქტურული პროექტი განხორციელდა.