„მიშას თვითლიკვიდაციის პროგრამა დიდი ხანია, ჩართულია”, – ამის შესახებ პიარ -ტექნოლოგმა ლალი მოროშკინამ „ასავალ-დასავალთან” ინტერვიუში განაცხადა. მიხეილ სააკაშვილს რჩევით მიმართა, რომ შეაჩეროს ის მარათონი, რაც დაწყებული აქვს და ქართული მართლმსაჯულების წინაშე წარსდგეს. ამასთან, ლალი მოროშკინა მიხეილ სააკაშვილის ჯანმრთელობის მდგომარეობაზე საუბრობს და ექსპრეზიდენტს ინსულტს უწინასწარმეტყველებს.
„დღეს მას ორი არჩევანი აქვს – ეკლესია ან ციხე. ეკლესიისთვის სათანადოდ დაბრძენებული არ არის. მე, როგორც იმ ძველი წლების გულშემატკივარი, ვურჩევ – ქართული მართლმსაჯულების წინაშე წარდგეს! ეს საუკეთესო გამოსავალია!
მიშა, ადამიანს ციხე არ კლავს, ის საშუალებას მოგცემს, ბევრ რამეზე დაფიქრდე და გააანალიზო. სასიცოცხლოდ მნიშვნელოვანია, ეს მარათონი შეაჩერო, შენი ძალები უშრეტი არ არის და ინსულტი გარდაუვალი იქნება. აი მერე, მართლა ვეღარავინ გიშველის”, – განაცხადა ლალი მოროშკინამ.
ინტერვიუში მოროშკინა წარსულს იხსენებს და ამბობს, რომ მიხეილ სააკაშვილი მისი ყოფილი მეუღლის თანაკლასელი იყო და სამივე ერთად ბავშვობიდან მეგობრობდნენ. თუმცა, მისი თქმით, როგორც კი მიხეილ სააკაშვილი ხელისუფლებაში მოვიდა, თითქმის თანაკლასელების უმრავლესობა ციხეში ჩასვა.
„რეალურად, მიშა ჩემი ყოფილი მეუღლის ნუკრი ჩაგანავას კლასელი იყო, რომელთანაც სასკოლო რომანი მქონდა. ჩვენ ყველანი ერთად ვიყავით და ვმეგობრობდით. მეც ვხედავდი მიშას ბევრ კარგ თუ ცუდ თვისებას – როდესაც ბავშვები შატალოზე მიდიოდნენ, იგი სკოლაში რჩებოდა და თანაკლასელებს აბეზღებდა“, – აცხადებს ლალი მოროშკინა გაზეთ „ასავალ-დასავალთან“ ინტერვიუში.