8 სექტემბერს კიევის ცენტრში მომხდარი აფეთქებისას გარდაცვლილი თემურ მახაური პანკისის ხეობაში სოფელ დუისში დაკრძალეს. ინფორმაციას სააგენტო ipn-ი ავრცელებს.
დუისში ახმეტის მუნიციპალიტეტის გამგებლის წარმომადგენელი თამარ მარგოშვილის თქმით, თემურ მახაური საქართველოში, სავარაუდოდ, 12 სექტემბერს ჩამოასვენეს და იმავე დღეს დაკრძალეს.
“სოფელ დუისის მცხოვრებლები ადასტურებენ, რომ პაპასკირი აღნიშნულ სოფელში ჩამოასვენეს და დაკრძალეს. კვირის რომელ დღეს იყო დანამდვილებით, ვერ გეტყვით, მაგრამ, სავარაუდოდ, სამშაბათს ჩამოასვენეს და ამავე დღეს დაკრძალეს. როგორც ადგილობრივები ამბობენ, დაკრძალვისას სოფელში მანქანების დიდი კოლონა შემოვიდა“, – განაცხადა თამარ მარგოშვილმა.
8 სექტემბერს კიევის ცენტრში ქართული სანომრე ნიშნების მქონე ავტომანქანა აფეთქდა. ავტომობილში სამი ადამიანი იმყოფებოდა – თემურ მახაური, რომელიც ადგილზე გარდაიცვალა; ქალი, რომელსაც ფეხის ამპუტაცია ჩაუტარდა და ბავშვი, რომელიც უვნებელი გადარჩა.