მიხეილ გიორგაძე კრიტიკოსებს პასუხობს

კულტურისა და ძეგლთა დაცვის მინისტრი მიხეილ გიორგაძე უცნაურობას უწოდებს კრიტიკას იმასთან დაკავშირებით, თუ რატომ გადაწყდა, რომ მსოფლიო ტენორის, ხოსე კარერასის კონცერტი ყოფილიყო უფასო.
“უცნაურია, ფასიანია კრიტიკაა, უფასოა – მაინც კრიტიკაა. ლოგიკა იყო შემდეგი – ამ მასშტაბის და ხარისხის კონცერტი რეგიონში პრაქტიკულად პირველად ტარდება. ძალიან დიდი ინტერესი გამოიწვია ამ კონცერტმა. ქუთაისის მერისგან და გუბერნატორისგან ვიცი, რომ პრაქტიკულად მთელი რეგიონი აპირებს ქუთაისში ჩასვლას, გვინდოდა შეზღუდვა არ ყოფილიყო რაოდენობრივად და ყველას მისცემოდა ამ კონცერტზე დასწრების საშუალება“, – განაცხადა გიორგაძემ.
შეკითხვაზე, შეიძლებოდა თუ არა იგივე ლოგიკით რობი უილიამსის კონცერტიც ყოფილიყო უფასო, გიორგაძემ აღნიშნა, რომ „ლოგიკა განსხვავებულია და დიდი მნიშვნელობა აქვს“.
„გადაწყდა ასე, რამდენად სწორი იყო ან არა, ამას გამოცდილება გვიჩვენებს, რომელსაც მივიღებთ. გვინდოდა რეგიონისთვის მაქსიმალური ხელშეწყობა ყოფილიყო, თუმცა ეს გარკვეულ სირთულეებს გვიმატებს იმ თვალსაზრისით, რომ ამ რაოდენობის ადამიანების მართვა გაცილებით რთული იქნება “, – აღნიშნა მინისტრმა.