“ივანიშვილი რომ არ ყოფილიყო ის სახადი, რასაც ჰქვია „ნაციონალური მოძრაობა“, ქვეყანას არ მოშორდებოდა”

ირაკლი შიხიაშვილი გაზეთ “პრაიმ ტაიმის” ინტერვიუში აცხადებს, რომ “ნაციონალური მოძრაობიდან” წამოსვლის შესახებაც საუბრობს და ამბობს, რომ ჯერ კიდევ 2011 წელს ამ საკითხზე ფარულ მოლაპარაკებებს ირაკლი ალასანიასთან აწარმოებდა.

ირაკლი შიხიაშვილი:

– ჩემს წინააღმდეგ მიმართული კამპანიით ცდილობდნენ არა მხოლოდ ჩემი პერსონის, არამედ მთლიანად მთავრობის და ბიძინა ივანიშვილის დისკრედიტაციას. ივანიშვილი რომ არ ყოფილიყო ის სახადი, რასაც ჰქვია „ნაციონალური მოძრაობა“, ქვეყანას არ მოშორდებოდა.
– უკაცრავად, მაგრამ ბოლო წუთამდე ამ „სახადის“ წარმომადგენელი იყავით…
– როდემდე? ვერ დაგეთანხმებით ნამდვილად.
– თქვენ 2012 წლის სექტემბერში, საპარლამენტო არჩევნებამდე რამდენიმე დღით ადრე დატოვეთ „ნაციონალური მოძრაობის“ გუნდი. ასეა თუ მეშლება?
– რაკიღა ასე მიდგა საქმე მაშინ, რასაც გეტყვით პირდაპირ დაწერეთ. ძალიან დიდხანს ვდუმდი და დროა უკვე, საზოგადოებამ ეს გაიგოს: ირაკლი შიხიაშვილი „ნაციონალურ მოძრაობას“ დაუპირისპირდა 2011 წლის 11 ნოემბრიდან. მე 2012 წლის 27 სექტემბერს ამის დეკლარირება გავაკეთე საზოგადოების დასანახად, თორემ გუნდს მე დავუპირისპირდი ერთი წლით ადრე.
– ერთი წლის განმავლობაში თუ დაპირისპირებული იყავით, რატომ გააჟღერეთ ეს მაინცდამაინც არჩევნებამდე 4 დღით ადრე და არა მანამდე?
– მე არც პორტირებულის და არც ყვარყვარე თუთაბერის სახელს არ მივიღებ. ერთი კაცი ვერ მეტყვის, რომ ჩემი ქვეყნის საზიანო გადაწყვეტილება მივიღე ოდესმე. 4 დღით ადრეც საჯარო განცხადება ძალიან სერიოზული რისკი იყო. მაშინაც არავინ იცოდა, რა შედეგით დასრულდებოდა არჩევნები და ცხადია, დასასჯელთა შორის, პირველი მე ვიქნებოდი, თუ ისევ ნაციონალები გაიმარჯვებდნენ. 2011 წლის 11 ნოემბერს ამერიკიდან ჩამოვიდა ნიკოლოზ ჩხეიძე, ქართული სათვისტომოს ხელმძღვანელი და მითხრა, – ვიწყებთ ბრძოლას „ნაციონალური მოძრაობის“ წინააღმდეგო. ვიკითხე, ვისი სახელით მესაუბრებოდა და მან მითხრა, რომ ეს იყო ბიძინა ივანიშვილი. მისი ინიციატივითვე მე შევხვდი მაშინდელი კოალიციის ერთ-ერთ ლიდერს ირაკლი ალასანიას. ამის შემდეგ პერმანენტულად გვქონდა კომუნიკაცია და ჩემი მეგობრები თანდათან შედიოდნენ კოალიცია „ქართულ ოცნებაში“. 2012 წლის 21 სექტემბერს უნდა გამეკეთებინა საჯარო განცხადება, მაგრამ მოხდა ისე, რომ იმ დღეს ბატონ ბიძინასთან შეხვედრა ვერ შედგა, ეს მოხდა მხოლოდ 27 სექტემბერს, რის შემდეგაც მე გავაკეთე განცხადება „ნაციონალური მოძრაობის“ ფრაქციის დატოვების შესახებ. ამრიგად, სიმართლე არის ის, რომ მე „ნაციონალურ მოძრაობას“ დავუპირისპირდი 2011 წლის ნოემბერში, თუმცა ამაზე იცოდა ვიწრო წრემ.