“მე პირადად, რასაც მივაღწიე ცხოვრებაში, როგორც პირადში, ისე სამსახურეობრივში, მასწავლებლების დამსახურებაა”

მე პირადად, რასაც მივაღწიე ცხოვრებაში, როგორც პირადში, ისე სამსახურეობრივში, მასწავლებლების დამსახურებაა, – ამის შესახებ განათლებისა და მეცნიერების მინისტრმა, ვიცე – პრემიერმა ალექსანდრე ჯეჯელავამ პედაგოგებთან შეხვედრის დაწყებამდე განაცხადა.
მინისტრმა მასწავლებლებს პროფესიული დღე მიულოცა.
“ძალიან მნიშვნელოვანი დღეა განათლების სისტემისთვის და საქართველოსთვის, ეს არის მასწავლებლის დღე. ეს არის პროფესიული დღესასწაული 66 ათასზე მეტი ადამიანისთვის. ეს არის დღესასწაული მათთვის, ვინც პედაგოგები იყვნენ და მათთვის, ვინც ემზადება ახლა იმისთვის, რომ მასწავლებელი გახდეს. მე პირადად, რასაც მივაღწიე ცხოვრებაში, როგორც პირადში, ისე სამსახურეობრივში, მასწავლებლების დამსახურებაა. მინდა მთელი გულით მივულოცო პედაგოგებს მთავრობის სახელით. ძალიან რთული პროფესიაა და ყველაზე დაუფასებელი საქმე. მინდა ვუსურვო წარმატება და აღვუთქვა მთავრობის მხრიდან ყოველგვარი მხარდაჭერა, ხელშეწყობა, სითბო და სიყვარული. დაუფასებელი საქმეა, რადგან თითოეულ ჩვენგანს უყვარს თქმა, რომ ყველაფერს ჩემით მივაღწიე, თქვენც გითქვამთ ალბათ ეს. ეს არის დაუფასებლობა ჩვენი პედაგოგების, მშობლების და იმ ხალხის, ვინც სული და გული ჩადო ჩვენს აღზრდაში”, – განაცხადა ჯეჯელავამ.