ადგილობრივი თვითმმართველობის არჩევნებზე, კახეთის რეგიონის ეთნიკური უმცირესობებით დასახლებულ თემებში ქალთა დაბალი აქტივობაა.
იორმუღანლოს თემის სოფლებში მცხოვრები აზერბაიჯანელი ქალები არჩევნებში, როგორც წესი, დამოუკიდებლად არ მონაწილეობენ. გამონაკლისს წარმოადგენენ საჯარო სკოლებში დასაქმებული ქალები. როგორც ადგილობრივები ამბობენ, ქალების უმეტესობა შვილების მოვლით, ოჯახის საქმითა და მესაქონლეობით არიან დაკავებულნი. მათი უმრავლესობა მინდორში ფიზიკურად შრომობს.
როგორც გაზეთი “კახეთის ხმა” ადგილობრივ მოსახლეობაზე დაყრდნობით წერს, აზერბაიჯანული თემის წარმომადგენელი ქალების უმრავლესობა არჩევნებზე არასდროს ყოფილა და არც ის იციან, 21 ოქტომბერს რა არჩევნები ტარდება. ამბობენ, რომ ხმის მიცემის გადაწყვეტილებას დამოუკიდებლად ვერ იღებენ, ამიტომ ოჯახიდან არჩევნებზე ან მხოლოდ მამაკაცები დადიან, ან იმ კანდიდატს შემოხაზავენ, რომელსაც მეუღლე ეტყვის. თუმცა, არიან ისეთებიც, ვისაც არჩევნებში მონაწილეობა და საკუთარი არჩევანის დაფიქსირება სურთ, მაგრამ არაფერი იციან საკუთარი საარჩევნო უფლებების შესახებ და მერობის, თუ დეპუტატობის კანდიდატებს საარჩევნო პლაკატებიდან იცნობენ და მათ ნომრებს იმახსოვრებენ.
“მე პლაკატებზე რომ არის ნომრები, იმით ვიმახსოვრებ ვინ არიან. აქ რომ მოდიან ჩვენ გარეთ არ გავდივართ და თანაც ჩვენი ენა არ იციან, რა უნდა გავიგოთ? ქართულად, რამდენიმე სიტყვა ვიცით. კაცებმა იციან ქართული და უსმენენ ხოლმე, მაგრამ სახლში ამაზე არ ვლაპარაკობთ“, – აცხადებს ერთ-ერთი ადგილობრივი მცხოვრები.
“კვლევის მიხედვით, არჩევნებში აზერბაიჯანელთა თემის ქალთა მონაწილეობა განსაკუთრებით დაბალია. ქართული ენა საკომუნიკაციო დონეზეც კი არ იცის ეთნიკური უმცირესობის ამომრჩეველთა 41,8 %–მა. დაახლოებით 22%–ს ესმის, მაგრამ სახელმწიფო ენაზე კითხვისა და წერის უნარები არ აქვს. ქალების 54%–მა კი ქართული ენა საერთოდ არ იცის”, – წერს გაზეთი “კახეთის ხმა”.
არის შემთხვევები, როდესაც არჩევნებში ქალების მონაწილეობას მამაკაცებიც ეწინააღმდეგებიან და აცხადებენ, რომ მათმა მეუღლეებმა ქართულად წერა – კითხვა და საუბარი არ იციან და შესაბამისად არჩევნებზეც არაფერი ესაქმებათ.
თელავის „გენდერის მედიაცენტრში“ საარჩევნო კულტურის განვითარებას საზოგადოების ცნობიერების ამაღლებაში ხედავენ. ექსპერტები არჩევნებზე ქალთა დაბალი აქტივობაზე საუბრობენ და განმარტავენ, რომ უნდა შეიქმნას ერთიანი სტრატეგია ცალკეული რეგიონების სპეციფიკის გათვალისწინებით.
„გენდერული თანასწორობის ხელშეწყობისთვის საქართველოში“ გაეროს ერთობლივი პროგრამის ფარგლებში, რამდენიმე წლის წინათ ჩატარებული კვლევის თანახმად, ჯერ კიდევ მყარია ტრადიციული შეხედულებები გენდერულ როლებზე: ქალის ფუნქციაა შვილების მოვლა – აღზრდა და საშინაო საქმეები. კვლევამ აჩვენა, რომ გამოკითხულთა უმრავლესობა (63%) მიიჩნევს, რომ კარგი ცოლი უნდა დაემორჩილოს მეუღლეს, მაშინაც კი, როდესაც არ ეთანხმება მას.
“ბევრი ქალი ფიქრობს, რომ ვალდებულია, იჯდეს სახლში, შვილები ზარდოს, სახლი დაალაგოს, ქმარს მომზადებული საჭმელი დაახვედროს, მოემსახუროს და დაემორჩილოს მას. განსაკუთრებით ეთნიკურ უმცირესობებში. გენდერული ბალანსი რომ არ დაირღვეს, უნდა ჩატარდეს მეტი პრევენციული ღონისძიებები როგორც სახელმწიფოს, ასევე არასამთავრობო ორგანიზაციების მხრიდან“, – მიაჩნია ასოციაცია „ვეჯინის“ თავმჯდომარე ლაურა ხარიტონაშვილს.
წყარო: http://www.knews.ge