ექსპერტი გია ხუხაშვილი თვითმმართველობის არჩევნების პროცესს „პრაიმტაიმთან“ აფასებს და ამბობს, რომ მისთვის „ნაციონალური მოძრაობის“ მარცხი მოულოდნელი არ ყოფილა.
– როგორი მერი იქნება კალაძე, რამდენად შეძლებს ის საკუთარი გეგმების განხორციელებას?
– ნორმალური მერი იქნება, ყოველ შემთხვევაში მისი შესაძლებლობები ბევრად აღემატება ნარმანიას შესაძლებლობებს, როგორც პოლიტიკური, ისე ტექნიკური თვალსაზრისით. გააჩნია, თვითონ როგორ გამოიყენებს ამ შესაძლებლობებს – პოზიტიურად თუ ნეგატიურად. ამას დრო აჩვენებს. ასე რომ, წინასწარი შეფასებისგან თავს შევიკავებ.
– როგორ ხედავთ ელისაშვილს მომავალში? რამდენად უნდა ველოდოთ, რომ პარტიას შექმნის და პოლიტიკაში აქტიურად ჩაერთვება?
– მემგონი, ის მაინც ინდივიდუალისტია და არ ველოდები მისგან პოლიტიკური პარტიული ლიდერის ჩამოყალიბებას. არ ზის მის ხასიათში, რომ რაღაც სტრუქტურულად და სისტემურად იმუშაოს პოლიტიკაში. მე ამ მიმართულებით მას ვერ ვხედავ. თუმცა ელისაშვილი იყო ძალიან კარგი ტესტი იმისა, რა სჭირს ქართველ საზოგადოებას და რა მძიმე მდგომარეობაშია პოლიტიკური ელიტა. როდესაც ადამიანს არ აქვს არანაირი რესურსები, არ აქვს არანაირი პოლიტიკური გამოცდილება და გადის მეორე ადგილზე, ეს ნიშნავს, რომ საზოგადოებაში არის სუფთა ფურცლიდან პოლიტიკური მოთხოვნილება. შორს ვარ იმ აზრისგან, რომ ელისაშვილი, როგორც პარტიული პოლიტიკური ლიდერი ჩამოყალიბდება, მაგრამ დარწმუნებული ვარ, რომ ამ ადგილს ვიღაც აუცილებლად დაიკავებს.
– რამდენად მოულოდნელი იყო „ნაციონალური მოძრაობისთვის“ მესამე პოზიცია და რამ განაპირობა ეს პოზიცია?
– ეს მოსალოდნელი იყო, რადგან თავის დროზე ხალხმა ვერდიქტი გამოუტანა „ნაციონალურ მოძრაობას“ და არც მოველოდი, რომ რამე კონკურენციას გაუწევდა ხელისუფლებას. ისინი გავიდნენ მეორე ადგილზე და დღეს ჩვენ მივიღეთ თვითმმართველობა, დაკომპლექტებული „ქართული ოცნებით“, „ნაციონალური მოძრაობის“ ორი გამსვლელით. ეს არის ტრაგედია ამ ქვეყანაში, რომ საზოგადოებას არ აქვს ალტერნატივა მესამის არჩევის, არჩევანი კეთდება ცუდსა და უარეს შორის. ისევ ეს ორი პოლუსი შერჩა და საზოგადოებამ ისევ სულელურ თამაშებს უნდა უყუროს. პრობლემა „ქართულ ოცნებაში“ არ არის, პრობლემა არის ქართულ სიმბიოზში „ქართული ოცნებისა“ და „ნაციონალური მოძრაობისა“. ძალიან თბილად გრძნობენ თავს, დილას ერთმანეთს აგინებენ, საღამოს კი ერთ ლოგინში წვებიან. ეს არაჯანსაღი ვითარება ჩამოყალიბდა, რაც აუცილებლად მიგვიყვანს მორიგ ძალიან სერიოზულ დაძაბულობამდე.
წყარო: პრაიმტაიმი