„უკრაინაში გადატრიალება მინდა მოვახდინო, გადატრიალება გონებაში, პოსტსაბჭოთა ოლიგარქებში, მონობაში, სიღარიბის წინააღმდეგ”, – ამის შესახებ საქართველოს ყოფილმა პრეზიდენტმა მიხეილ სააკაშვილმა უკრაინული ტელეკომპანიის ეთერში განაცხადა. პოლიტოლოგი ვახტანგ ძაბირაძე აღნიშნულ განცხადებას „რეპორტიორთან” საუბარში გამოეხმაურა.
„მიხეილ სააკაშვილის ამ განცხადებიდან ჩანს, რომ ის ადამიანების მენტალიტეტის შეცვლაზე საუბრობს. რა თქმა უნდა, ეს პირდაპირი გაგებით გადატრიალებას არ გულისხმობს, თუმცა ეს ფაქტი თავისთავად გულისხმობს იმას, რომ ასეთი მენტალური ცვლილებების შემდეგ ოლიგარქები ვეღარ მოვლენ ხელისუფლებაში. თუმცა ამ განცხადების ქვეტექსტში შეიძლება იგულისხმებოდეს უფრო მასშტაბური გადატრიალებაც და შეფარვით თქმით, სააკაშვილმა ერთგვარად უკან დასახევი გზა დაიტოვა, თუ ამის საჭიროება იქნება.
სააკაშვილი მიტინგებით, მანიფესტაციებით, საპროტესტო გამოსვლებით შეეცდება, საზოგადოებრივ აზრზე მოახდინოს გავლენა და ზეწოლა. მეორე მომენტი არის – რამდენად მოახერხებს ის უკრაინული ოპოზიციური ძალების მობილიზებას და ამ გარემოს შექმნას. ვიცი ერთი რამ, რომ უკრაინის ხელისუფლება უნდა იყოს ძალიან ფრთხილად და რაც მთავარია, არ უნდა შექმნან მისგან გმირი”, – განაცხადა ძაბირაძემ.