ქედაში ავარიის შედეგად, ექსკურსიაზე დაშავებული ექვსი ბავშვიდან ერთს, გვიან ღამით ოპერაცია ჩაუტარდა. მისი მდგომარეობა, ექიმების თქმით, სტაბილურია.
პირველადი სამედიცინო დახმარება მოზარდებს ქედის სამედიცინო ცენტრში გაუწიეს. მოგვიანებით კი ბავშვები ბათუმის დედათა და ბავშვთა საავადმყოფოში გადაიყვანეს. ექიმების თქმით, საშუალო სიმძიმისაა ერთი მოზარდის მდგომარეობა – მას გვიან ღამით თავის არეში ოპერაცია ჩაუტარდა. ექიმების მეთვალყურეობის ქვეშ რჩება კიდევ ორი მოზარდი. დანარჩენებმა საავადმყოფო უკვე დატოვეს.
ბათუმის მეექვსე საჯარო სკოლის მეექვსე კლასის მოსწავლეები ხულოში, სხალთის ხეობაში ექსკურსიაზე იმყოფებოდნენ. მათთან ერთად იყვნენ პედაგოგები და მშობლები.
ბათუმისკენ მიმავალი მიკროავტობუსიდან ექვსი არასრულწლოვანი გადმოვარდა. წინასწარი მონაცემებით, ბავშვები თამაშობდნენ, რა დროსაც, სავარაუდოდ, კარის გამღები გამოსწიეს და გზის სავალ ნაწილზე ჩავარდნენ. შემთხვევა ბათუმი-ახალციხის ცენტრალურ მაგისტრალზე, სოფელ გობრონეთთან მოხდა.
მომხდარ ფაქტზე მიმდინარეობს გამოძიება.