სრულდება ეტაპი, რომელიც სრულყოფილად აყალიბებს სამხრეთ კავკასიური დერეფნის შექმნას – სამხრეთ კავკასიურ დერეფანში ჩვენ გვექნება ენერგო, სატრანზიტო გზები და ასევე სატრანსპორტო კომუნიკაციები, – ამის შესახებ აზერბაიჯანში საქართველოს საგანგებო და სრულუფლებიანი ელჩი თეიმურაზ შარაშენიძე აცხადებს.
მისი თქმით, ბაქო-თბილისი-ყარსის სარკინიგზო მაგისტრალი არის პროექტი, რომელიც აერთებს სამი ზღვის – კასპიის, შავი და ხმელთაშუა ზღვის რეგიონებს.
”ერთ-ერთი ყველაზე მთავარი, რასაკვირველია, იქნება ბაქო-თბილისი-ყარსის სარკინიგზო მაგისტრალი. მისი მნიშვნელობა უაღრესად დიდია, სცდება რეგიონის ინტერესებს და გადის, როგორც აზიის, ასევე ევროპის ქვეყნებზე. ამიტომაც ცერემონიას ესწრებიან შუა აზიის სახელმწიფოთა მეთაურები – ყაზახეთის პრეზიდენტი ბატონი ნაზარბაევი, უზბეკეთის პრემიერ-მინისტრი, ბატონი არიპოვი. რა თქმა უნდა, ღონისძიებაში ასევე მონაწილეობენ თურქეთის პრეზიდენტი ბატონი ერდოღანი და ჩვენი ქვეყნის პრემიერ-მინისტრი ბატონი გიორგი კვირიკაშვილი. მწყობრში დგება ერთ-ერთი მნიშვნელოვანი გზა, რომელიც სავსებით პასუხობს ჩინეთის მიერ ინიცირებულ და უკვე რეალიზებად ახალი აბრეშუმის გზის პროექტს, რომლის კონცეფციაც არის ”ერთი სარტყელი – ერთი გზა”. ასევე მნიშვნელოვანია, რომ ამ გზის მეშვეობით, ჩვენი მოქალაქეებისთვის შეიქმნება ახალი სამუშაო ადგილები. მაგისტრალი მიმზიდველი გახდება როგორც ტვირთების გადაზიდვისთვის, ისე მგზავრების მიმოსვლისა და ტურისტების მოზიდვის კუთხით. ვფიქრობთ, ამ პროექტის განხორციელებით, მრავალ სოციალურ სიკეთეს მიიღებს საქართველოს მოსახლეობა”, – აცხადებს თეიმურაზ შარაშენიძე.