ვფიქრობ, ჩვენ ის საარჩევნო სისტემა უნდა ჩამოვაყალიბოთ, რომელიც ქართული საზოგადოების პლურალიზმს ასახავს და პოლიტიკური ინსტიტუტების პლურალიზმში გარდაიქმნება, – განაცხადა საქართველოს პრეზიდენტმა თვითმმართველობის არჩევნებზე საუბრისას.
როგორც გიორგი მარგველაშვილმა აღნიშნა, არჩევნები ნორმალურ გარემოში, სერიოზული დარღვევების გარეშე ჩატარდა.
“დაახლოებით ათი დღის წინ არჩევნებში “ქართულმა ოცნებამ” გაიმარჯვა და ყველა რეგიონში უმრავლესობა მიიღო. არჩევნები ნორმალურ საარჩევნო გარემოში სერიოზული დარღვევების გარეშე ჩატარდა. ოპოზიციას საარჩევნო კამპანიის წარმოების საშუალება ჰქონდა. ამდენად შესაძლოა გაჩნდეს კითხვა, როდესაც კონკურენციაა და ერთი პარტია ყოველთვის უმრავლესობით იმარჯვებს, ეს არის თუ არა კარგი. ეს არ არის დემოკრატიის მიზანი, დემოკრატია კონკურენციას ნიშნავს. ეს პირდაპირი გზავნილია, რომ საარჩევნო სისტემაში რაღაც პრობლემაა. ყოველთვის, როდესაც უმრავლესობით ერთი პარტია იმარჯვებს ეს ნიშნავს, რომ საარჩევნო სისტემა პოლიტიკურ განწყობებს და პლურალიზმს რეალურად არ ასახავს და ამ პლურალიზმის გარდაქმნა რეალურ შედეგებში, პარლამენტსა და თვითმმართველ ორგანოებში არ ხდება. ვფიქრობ, ჩვენ ის საარჩევნო სისტემა უნდა ჩამოვაყალიბოთ, რომელიც ქართული საზოგადოების პლურალიზმს ასახავს და პოლიტიკური ინსტიტუტების პლურალიზმში გარდაიქმნება”, – განაცხადა გიორგი მარგველაშვილმა.