პარლამენტის ყოფილი წევრი, ირაკლი გოგავა პრემიერის გერმანიაში ვიზიტსა და ანგელა მერკელის განცხადებებს “ფეისბუქის” საკუთარ გვერდზე ეხმაურება.
“დაადგა თავზე და ათქმევინა მერკელს: “მხარს ვუჭერთ უვიზო რეჟიმს საქართველოსთვის!” 25 წელი ვითმინე ვიზები და ორ-სამ თვესაც მოვითმენ.
ჩაეთვალა პრემიერს!
რამოდენა ბიუროკრატია ჰქონია ამ ევროკავშირს, რამდენი სტრუქტურა გაიარა ამ ვიზების საკითხმა?!”, – წერს ირაკლი გოგავა.
„ჩვენ გასულ კვირას – ტელეფონით და დღესაც ვილაპარაკეთ ვიზალიბერალიზაციაზე. ევროკომისიამ დაადგინა, რომ საქართველომ შეასრულა ყველა კრიტერიუმი ვიზალიბერალიზაციისთვის. დღეს ლაპარაკია იმაზე, როდის მივიღებთ ჩვენ საბოლოო გადაწყვეტილებას ვიზალიბერალიზაციის შესახებ. მე წინა კვირასაც, სატელეფონო საუბარში ვილაპარაკე ამაზე, რომ ჩვენ ვიზალიბერალიზაციას განვიხილავთ შეჩერების მექანიზმის კონტექსტში. ამას არ აქვს მაინცდამაინც საქართველოსთან უშუალო კავშირი, არამედ ზოგადად, თუკი დიდი სირთულეები წარმოიქმნება და მაგალითად, რომელიმე ქვეყნის ძალიან ბევრი მოქალაქე ჩამოვა და მოითხოვს პოლიტიკურ თავშესაფარს, როგორც შარშან სირიის შემთხვევა იყო – ამის განმეორება რადგან არ გვინდა, ვისწრაფვით შეჩერების მექანიზმისაკენ. ეს საკითხი ახლა ევროპარლამენტმა უნდა გადაწყვიტოს და მე დიდი იმედი მაქვს, რომ ძალიან მალე იქნება კენჭისყრა ევროპარლამენტში საქართველოს მოქალაქეებისთვის ვიზალიბერალიზაციის მინიჭების საკითხებზე“, – განაცხადა მერკელმა პრემიერთან შეხვედრის შემდეგ.