საქართველოს მოქალაქეებს შეუძლიათ, ბევრი მიღწევით იამაყონ, მათ შორის მრავალფეროვანი პოლიტიკური გარემოთი, მათი დიდი უმრავლესობა ქვეყნის დემოკრატიულ კურსს უჭერს მხარს. ამის შესახებ NDI-ის შემფასებელთა მისიის განცხადებაშია აღნიშნული.
“უფრო მეტიც, დღემდე ვერ მოხერხდა ლიდერებისა და სახელმწიფო ინსტიტუტების მიმართ არსებული არაერთი მაღალი მოლოდინის სრულად გამართლება. საქართველოში დემოკრატიული საარჩევნო პროცესისთვის საჭირო კომპონენტები უმეტესწილად არსებობს, თუმცა ქვეყნის ლიდერებს ამ პოტენციალის განსახორციელებლად პოლიტიკური ძალისხმევისა და პარტიული თავშეკავებულობის გამოყენება მოუწევთ”,- ნათქვამია განცხადებაში.
განცხადების მიხედვით, სადამკვირვებლო მისიის წარმომადგენლები აღნიშნავენ, რომ საპარლამენტო არჩევნების კეთილსინდისიერად ჩატარება სამი მთავარი გამოწვევის დაძლევაზე იქნება დამოკიდებული – შესაძლო ძალადობა და დაშინება; უნდობლობა კანონის მიუკერძოებლად აღსრულებასთან დაკავშირებით და აღქმა, რომ გარკვეულ პირებს კულისებს მიღმა პროცესებზე მნიშვნელოვანი გავლენის მოხდენა შეუძლიათ.
NDI-მ ხელისუფლებას და საარჩევნო ადმინისტრაციას, პარლამენტს , პოლიტიკურ პარტიებსა და არასამთავრობო ორგანიზაციებს ზემოხსენებული საკითხების გასაუმჯობესებლად რეკომენდაციები შესთავაზა, მათ შორის პოლიტიკური პარტიების ქცევის კოდექსთან, კანდიდატების დებატებთან, კანონის სამართლიანი და თანმიმდევრული გამოყენების საჭიროებასთან, საარჩევნო სისტემასთან დაკავშირებული შეთანხმების მიღწევის ინკლუზიური და გამჭვირვალე პროცესის საჭიროებასთან, ქალი კანდიდატების მოზიდვასთან და გადამზადებასთან დაკავშირებით და ასევე კამპანიის ფინანსებისა და შემოწირულობების მონიტორინგთან და გამოძიებასთან დაკავშირებით.
„საქართველოს მოქალაქეების იმედებისა და მოლოდინების გასამართლებლდ წარმომადგენლობითი, ანგარიშვალდებული, ეფექტური და რეფორმებზე ორიენტირებული საკანოდებლო ორგანოს არჩევა უმნიშვნელოვანესია. ქვეყნის ლიდერები უნდა იყვნენ სამაგალითონი, საარჩევნო პროცესის სამართლიანად და მშვიდობიანად ჩატარების ამოცანა საკუთარ პარტიულ ინტერესებზე მაღლა დააყენონ”, – აცხადებს NDI-ს მისია.