„ნაციონალური მოძრაობის“ რეჟიმის მიერ დაზარალებულმა ზაზა გვიმრაძემ, რომელიც ე.წ. ყინწვისის სპეცოპერაციის საქმის ფარგლებში, 2011 წელს დააკავეს, პარლამენტის დროებითი საგამოძიებო კომისიის სხდომაზე, გლდანის სასჯელაღსრულების N8 დაწესებულებაში, კარანტინის დაშლის დროს განხორციელებული ძალადობის ფაქტები გაიხსენა.
მისი განცხადებით, კარანტინის დაშლისას, მას ალექსანდრე მუხაძემ, რომელიც იმ დროს გლდანის ციხის უფროსი იყო, მოსთხოვა, ნინო ბურჯანაძისთვის შეეგინებინა, ვინაიდან ეგონა, რომ 26 მაისს თბილისში დარბევის შედეგად დააკავეს. უარის შემდეგ კი, გვიმრაძის თქმით, ციხის თანამშრომლები მას სასტიკად გაუსწორდნენ.
„კარანტინში იმდენი ხალხი იყო, უკვე სუნთქვა ჭირდა, თან ცხელოდა, თან თავი არ უნდა აგეწია, მუხაძესთან უნდა მისულიყავი, ის შეგეკითხებოდა რაღაცას და ეგრევე იწყებოდა „დანგრევა“. მუხაძემ მე მითხრა, რახან 26 მაისი იყო, ნინო ბურჯანაძეს შეაგინეო, მე ვუთხარი, საერთოდ არ ვიცნობ ნინო ბურჯანაძეს, ტელევიზორში მყავს ნანახი, მიზეზი მითხარით რატომ შევაგინო ბურჯანაძეს-მეთქი. მაგის წევრი არ ხარო? არაფრის წევრი არ ვარ, სხვაგან დამიჭირეს საერთოდ და დამესივნენ რომელია, მომლეს ცემაში. სულ დამტვრეული ვიყავი, ხერხემალი, კისრის და წელის მალები ახლაც დაზიანებული მაქვს. მე ასეთი სასწაული ცემები არ მინახავს, ახალ-ახალ მეთოდებს იგონებდნენ. 52 კილო გამოვედი ციხიდან“, – განაცხადა ზაზა გვიმრაძემ.