კერძო ტელევიზიებს ხელყუმბარებს უგდებდით, მათ შორის „კავკასია“ და „მაესტრო“ გაიხსენეთ, – ასე მიმართა უმრავლესობის წევრმა ეკა ბესელიამ ოპოზიციონერ დეპუტატებს სერგო რატიანსა და რომან გოცირიძეს.
დეპუტატი მათ „ნაციონალური მოძრაობის“ მმართველობის პერიოდს ახსენებს და ურჩევს, მედია დამცველობას თავი დაანებონ, ვინაიდან ამ საკითხებზე საუბრისას თავდაცვის რეჟიმში თავად უნდა იყვნენ.
“მაყურებელი გვიყურებს და მუდმივად ასეთი უტიფარი განცხადებების კეთება სირცხვილია. წესით, ამ თემებზე საუბრის დროს, თქვენ თავდაცვის რეჟიმში უნდა იყოთ, მუდმივად თავს უნდა იცავდეთ და იქვე ამბობდეთ, რომელი ევროპული სტანდარტით, რომელი ევროპული მაუწყებლის საერთო ქცევის წესით ხდებოდა ის, როცა ტელეკომპანია „იმედს“ შტურმით იღებდით და სპეცრაზმით შევარდნილებმა ჟურნალისტები ფეხქვეშ გაიგდეთ? საინტერესოა, ბრიუსელში თქვენი ელჩი სამადაშვილი რომ იყო, ჩვენს ევროპელ კოლეგებს რას უყვებოდა, მათ შორის მედია დამცველებს, რომლებიც 7 ნოემბერს თავისი ფეხით საქართველოში ჩამოვიდნენ, როცა ტელეკომპანია „იმედი“ გათიშეთ? კერძო ტელევიზიებს ხელყუმბარებს უგდებდით, მათ შორის „კავკასია“ და „მაესტრო“ გაიხსენეთ. ასევე მოგვიყევით, რომელი ევროპული ფასეულობითა და სტანდარტით, ასევე ადამიანის უფლებების დაცვის რა გარანტიებით ახერხებდით იმას, რომ ყველა ტელევიზიას, მათ შორის პირველ არხს უწერდით, ერთი და იმავე ქრონომეტრაჟით, ვის რა უნდა ელაპარაკა და ერთმანეთისგან არაფერი არ განსხვავდებოდა, მათ შორის თანმიმდევრობაც კი. ბიძინა ივანიშვილს რომ ახსენებთ, იქვე გაიხსენეთ, მაშინ იმ ტელევიზიას რა უყავით“, – მიმართა ბესელიამ ოპოზიციონერ დეპუტატებს სერგო რატიანსა და რომან გოცირიძეს.