თქვენ საზოგადოებას ბოდიში მოუხადეთ, რადგან აღელდით, ამისთვის არ გაქვთ ბოდიში მოსახდელი, პირიქით, მოსახლეობას შეიძლება ის უფრო ეწყინა, რომ დროზე არ აღელდით, – ასე მიმართა ფრაქცია „საქართველოს პატრიოტების“ სხდომაზე, ფრაქციის წევრმა ემზარ კვიციანმა პრემიერ-მინისტრობის კანდიდატ გიორგი კვირიკაშვილს.
ემზარ კვიციანი გამოეხმაურა გიორგი კვირიკაშვილის სიტყვით გამოსვლის იმ ნაწილს, სადაც პრემიერმა პარლამენტში მომხდარი ინციდენტის გამო საზოგადოებას ბოდიში მოუხადა.
„ცოტა ხნის წინ, ზოგადად იყო ლაპარაკი სამართლიანობის აღდგენაზე. ბოლოს ერთი წლის უკან რომ შეგხვდით ქუთაისში, პარლამენტში, ამაზე იყო ლაპარაკი და დღეს, ფაქტობრივად, არანაირი სერიოზული ნაბიჯი არ არის წინ გადადგმული.
ძალიან მადლობელი ვარ, რომ ჩემი და გაამართლეს, როგორც ეკუთვნოდა და ამაზე მადლობა ერთი ორჯერ მოხდილი მაქვს, მაგრამ მარტო ჩემი და არ იყო იმ ადამიანების მიერ გაწამებული, დღეს აქ თავზე რომ გედგნენ და თავხედობდნენ.
თქვენ დღეს ჩვენი თანდასწრებით, საზოგადოებასთან ლაპარაკი ბოდიშით დაიწყეთ, რომ აღელდით, ამის გულისთვის არ გაქვთ ბოდიში მოსახდელი მოსახლეობისთვის, პირიქით, მოსახლეობას შეიძლება უფრო ის ეწყინა, რომ დროზე არ აღელდით, ისე არიან გათავხედებულები. ეს არის ყველაფერი იმ კოჰაბიტაციის შედეგი, რომელიც თავს მოგახვიეს ჯერ თქვენ და მერე სრულიად საქართველოს. თითქოს ხელისუფლება ვიღაცას ქეჩოთი უჭირავს და აცემინებენ ამ ნაციონალებს, რომლებმაც ქართველების სისხლი ცხრა წელიწადს სვეს და ახლა კიდევ აგრძელებენ, ეს იყო დღეს. ახლა რომ ვუყურებდი ტელევიზორს, არ ვიცი, ამის ატანა თუ შეიძლება“, – განაცხადა ემზარ კვიციანმა.