თბილისის მერმა, კახა კალაძემ თბილისის მოსართავად დახმარებისთვის მოსახლეობას თხოვნით მიმართა და აღნიშნა, რომ ერთი საახალწლო განათება მათ აივანზე ან ფანჯარაზე იქნება დიდი სილამაზე, რომელიც დაამშვენებს ქალაქს.
“მინდა ვისარგებლო შემთხვევით და მივმართო დედაქალაქის მოსახლეობას. მთელი ამ დღეების განმავლობაში, მაქსიმალურად ვცდილობდით ქალაქი გაგველამაზებინა საახალწლო ილუმინაციებით, თუმცა სამწუხაროდ, ჩვენი რეალობიდან გამომდინარე, ვერ მოვახერხეთ, რომ ყველა რაიონში შევიდეთ, ყველა ქუჩა მოვრთოთ და გავალამაზოთ. შესაბამისად, მინდა ვთხოვო ქალაქის მოსახლეობას დახმარება, თანადგომა და მონაწილეობის მიღება ქალაქის მორთვაში. ძალიან ელემენტარული რაღაცაა გასაკეთებელი. ყველანი ვემზადებით საახალწლოდ, შეძლებისდაგვარად და ერთი საახალწლო განათება საკუთარ აივანზე, საკუთარ ფანჯარაზე რომ დაამაგრონ, შეიძლება ერთი ნათურაც კი, დარწმუნებული ვარ, იქნება დიდი სილამაზე, რომელიც დაამშვენებს ქალაქს”,- აღნიშნა კალაძემ.