როგორც ფრაქცია „ქართული ოცნება-დემოკრატიული საქართველოს” თავმჯდომარე, მამუკა მდინარაძე განმარტავს, უმრავლესობაში საპარლამენტო ფრაქციების შემადგენლობასთან დაკავშირებით კონსულტაციები გრძელდება.
„პერსონალურ შემადგენლობასთან დაკავშირებით კონსულტაციები დღესაც გრძელდება. ის ჭორები, რომლებიც გავრცელდა ფრაქციებთან დაკავშირებით, იყო აბსოლუტურად უსაფუძვლო. ჩვენ პერსონალურ შემადგენლობებზე დღესაც ვიმსჯელებთ. რაღაც გადაჯგუფება სხვადასხვა წარმოდგენებისა და ტენდენციების მიხედვით მმართველ გუნდში ნამდვილად არ გვაქვს. ჩვენ ვართ ერთიანი გუნდი და მხოლოდ უკეთესი მენეჯმენტისა და კოორდინაციისთვის ხდება ეს ყველაფერი“,- განაცხადა მამუკა მდინარაძემ პირველ არხთან საუბრისას.
საპარლამენტო უმრავლესობამ პარლამენტში დამატებით ორი ფრაქციის შემქნა დაახლოებით ერთი კვირის წინ დააანონსა. გეგმის თანახმად, ყველაზე მსხვილ ფრაქციას „ქართული ოცნება – დემოკრატიულ საქართველოს“ ორი ცალკე ფრაქცია გამოეყოფა. არსებული ინფორმაციით, ერთ მათგანს გოჩა ენუქიძე, მეორეს კი ბიძინა გეგიძე უხელმძღვანელებენ. მმართველ გუნდში დაპირისპირებას გამორიცხავენ და განმარტავენ, რომ დამატებითი ფრაქციების შექმნა უკეთესი მართვისა და კოორდინაციისთვის გახდა საჭირო.
