ჩვენ საქმით დავადასტურეთ, რომ სოფლის მეურნეობა არის მთავრობისთვის მნიშვნელოვანი პრიორიტეტი, – ამის შესახებ საქართველოს პრემიერ-მინისტრმა, გიორგი კვირიკაშვილმა სასტუმრო „რედისონში“, „ერთიანი აგროკრედიტის“ პროექტის პრეზენტაციაზე განაცხადა.
„ჩვენ საქმით დავადასტურეთ, რომ სოფლის მეურნეობა არის მთავრობისთვის მნიშვნელოვანი პრიორიტეტი. ჩვენ დავიწყეთ პრაქტიკულად განადგურებული დარგის აღორძინება, გადავდგით პირველი რიგის ნაბიჯები სასოფლო-სამეურნეო დარგების განვითარებისთვის, გლეხებისა და ფერმერების წახალისებისთვის თითქმის ოთხი წელია, ვახორციელებთ არაერთ პროექტს, რომელმაც უკვე გამოიღო თავისი კონკრეტული შედეგები. ეს პროექტები იხვეწება და ფართოვდება, რომლის მიზანია, ხელი შეუწყოს გლეხებს და ფერმერებს მუშაობაში წარმოების განვითარებაში”, – აღნიშნა პრემიერ-მინისტრმა.
მისივე თქმით, ასეულობით დონორმა უკვე ისარგებლა სოფლის მეურნეობის პროექტებით, რომელმაც უკვე მოიტანა შედეგი – ფერმერებისთვის ფინანსური რესურსი ხელმისაწვდომი გახდა, გაიზარდა სოფლის მეურნეობის ინფრასტრუქტურა.
„ჩვენ გადავწყვიტეთ, ყველა მიმდინარე პროექტს დღეიდან თავი მოვუყაროთ ერთ აგროპროექტში, რადგან ჩვენი მუშაობა გახდეს უფრო ეფექტური და ხალხს უფრო მეტი სიკეთე მოუტანოს. რა თქმა უნდა, სოფლებში კიდევ ბევრი პრობლემაა გადასაჭრელი, თუმცა ეტაპობრივად ყველაფერს მოვაგვარებთ. ჩვენ ნამდვილად გვაქვს რესურსი საიმისოდ, რომ გავაძლიეროთ სოფელი“, – განაცხადა გიორგი კვირიკაშვილმა.