“სააკაშვილის შემთხვევაში ადგილი ჰქონდა არა კონსტიტუციური უფლების გამოყენებას, არამედ უფლებამოსილების ბოროტად გამოყენებას”

ეკა ბესელია საქართველოს პრეზიდენტის გუშინდელ განცხადებას ეხმაურება, რომელიც სასამართლოს მიერ მიხეილ სააკაშვილის მიმართ გამოტანილ განაჩენს ეხება.

„მოვისმინე პრეზიდენტის განცხადება და მინდა დავსვა ერთი ძალიან მარტივი კითხვა. საუბარია კონსტიტუციურ უფლებაზე, რომელიც ეხება ინდივიდუალური აქტის გამოცემას და შეწყალებას. შეწყალება არის სწორედ ინდივიდუალური აქტი და როდესაც საუბარია არა უფლების გამოყენებაზე, არამედ უფლებამოსილების ბოროტად გამოყენებაზე, მინდა დავსვა ასეთი კითხვა –  როდესაც ნებისმიერი პოლიტიკური პასუხისმგებლობის მატარებელი პირი საკუთარი უფლებამოსილების განხორციელების დროს ქმედებას ჩაიდენს მართლმსაჯულებისთვის ხელის შეშლის მიზნით, ან სხვა რაიმე უკანონო მიზნით, ან დანაშაულის დაფარვის მიზნით, ჩაითვლება თუ არა ეს დანაშაულად და არის თუ არა ეს კანონის დარღვევა?  როდესაც ჩვენ ვსაუბრობთ უფლებამოსილების ბოროტად გამოყენებაზე, ეს შეეხება კონსტიტუციურ  უფლებას თუ არა, როდესაც ამ უფლებამოსილების განხორციელების დროს დადგინდება, რომ ადგილი ჰქონდა მართლმსაჯულებისთვის ხელის შეშლას ან რაიმე უკანონო მოტივს და მიზანს, ან უკანონოდ ჩადენილ ქმედებას, ან დანაშაულის დაფარვას და ასეთი მიზნით მოქმედებდა ნებისმიერი მაღალი პოლიტიკური პასუხისმგებლობის მატარებელი პირი, არის თუ არა ეს დანაშაული და არის თუ არა ეს დასჯადი ქმედება?“,-  განაცხადა ბესელიამ.