სტრასბურგის სასამართლომ გადაწყვეტილებაში თქვა, რომ სააკაშვილის მიერ შეწყალების უფლების გამოყენება ამ საქმეზე იყო საოცარი, თუ გნებავთ, შოკისმომგვრელი, – ამის შესახებ წულუკიანმა მიხეილ სააკაშვილის განაჩენთან დაკავშირებული თემის კომენტირებისას განაცხადა.
როგორც თეა წულუკიანმა აღნიშნა, მიხეილ სააკაშვილის მიერ გირგვლიანის საქმეზე ბრალდებულების შეწყალებაზე კონტროლი უკვე განახორციელა მართლმსაჯულების ისეთმა ორგანომ როგორიც არის სტრასბურგის სასამართლო.
“ჩვენ ბოლო დღეებში ბევრი რამ მოვისმინეთ, თითქოს პრეზიდენტის უფლებამოსილება, შეიწყალოს დამნაშავე პირი, არის შეუზღუდავი, არის აბსოლუტური და ის არ უნდა დაექვემდებაროს არავითარ კონტროლს საზოგადოების, ან თუნდაც მართლმსაჯულების მხრიდან, რასაც მე ვერ ვიზიარებ. სააკაშვილის მიერ ამ კონკრეტულ საქმეზე შეწყალების უფლების გამოყენების კონტროლი უკვე განახორციელა ისეთმა მართლმსაჯულების ორგანომ, როგორიც არის სტრასბურგის სასამართლო. სტრასბურგის სასამართლომ გადაწყვეტილებაში თქვა, რომ სააკაშვილის მიერ შეწყალების უფლების გამოყენება ამ საქმეზე იყო საოცარი, თუ გნებავთ, შოკისმომგვრელი, რადგან როდესაც საქმე ეხება უდანაშაულო ადამიანის მკვლელობას, ამ საქმეზე იხდიან სასჯელს პატიმრები, იქ შეწყალების უფლება არ უნდა გამოყენებულიყო. ეს თქვა სტრასბურგის სასამართლომ, დაეყრდნო რა თურქულ პრეცედენტებს მსგავს საქმეებზე. აქედან გამომდინარე, დიახ, პრეზიდენტს აქვს ექსკლუზიური უფლება, შეიწყალოს მსჯავრდებულები, მაგრამ რა მიზნით და როგორ გამოიყენებს მისთვის მინიჭებულ ამ უფლებას პრეზიდენტი, რა თქმა უნდა, ეს კონტროლს ექვემდებარება. შესაბამისად, ვერანაირი ე.წ. მსუსხავი ეფექტი ამ სასამართლო გადაწყვეტილებას ვერ ექნება”, – განაცხადა თეა წულუკიანმა.