“დამოუკიდებელი სასამართლო არის ერთ-ერთი მთავარი ფუნდამენტი ჩვენი სახელმწიფოებრიობის. დამოუკიდებელი საქართველოს ისტორიაში მართლმსაჯულების სისტემა რჩება იმ ”აქილევსის ქუსლად”, რომელიც პრობლემად გასდევს, ფაქტობრივად, ყველა ხელისუფლებას, – ამის შესახებ საქართველოს პრეზიდენტმა გიორგი მარგველაშვილმა განაცხადა, რომელმაც იუსტიციის უმაღლესი საბჭოს არამოსამართლე წევრის თანამდებობაზე საპარლამენტო მდივანი ანა დოლიძე წარადგინა.
გიორგი მარგველაშვილმა ანა დოლიძე კვალიფიციურ, მამაც და ქვეყნის უზენაესი ღირებულებების ერთგულ იურისტად შეაფასა.
ამასთან, პრეზიდენტმა განმარტა, რომ სწორედ ანა დოლიძის თვისებებიდან გამომიდინარე, იგი იუსტიციის საბჭოს წევრად წარადგინა.
როგორც საქართველოს პრეზიდენტმა აღნიშნა, 2012 წლის ხელისუფლების ცვლილებების დროს, ყველას ჰქონდა ის მოლოდინი, რომ მართლმსაჯულების სისტემა თვისობრივად გაუმჯობესდებოდა, თუმცა ”დღეს შეიძლება ითქვას, მართლმსაჯულების მიმართ ბევრი კითხვაა, რაც საზოგადოების ნდობას ვერ პასუხობს”.
“დამოუკიდებელი სასამართლო არის ერთ-ერთი მთავარი ფუნდამენტი ჩვენი სახელმწიფოებრიობის. ის არა მარტო უზრუნველყოფს ჩვენი მოქალაქეების სამართლებრივ დაცულობას, არამედ არის ერთ-ერთი უმნიშვნელოვანესი გარანტი ჩვენი სახელმწიფოს ბალანსისა და გაწონასწორების მექანიზმების, ანუ დემოკრატიული და სამართლებრივი სახელმწიფოს ეფექტური ფუნქციონირების, ხოლო იუსტიციის უმაღლესი საბჭო არის ერთ-ერთი იმ ორგანოთაგანი, რომელსაც თავისი მანდატით, ევალება უზრუნველყოს მართლმსაჯულების სისტემის დამოუკიდებლობა და ეფექტური ფუნქციონირება. ჩვენ არაერთხელ აღვნიშნეთ იმის თაობაზე, რომ მართლმსაჯულების სისტემაში საკანონმდებლო ბაზა ჯერ კიდევ დასახვეწია. მათ შორის, უმაღლესი საბჭოს საკანონმდებლო ბაზა, რომელიც ბოლომდე გამჭვირვალესა და ეფექტურს გახდიდა ამ ორგანოს, ესეც გასაკეთებელია. თუმცა, მარტო საკანონმდებლო ბაზით, განსაკუთრებით, ისეთი ფაქიზი სისტემა, როგორიცაა სასამართლო სისტემა, როგორიცაა ქვეყნის მართლმსაჯულება, ვერ უზურუნველყოფს თვისობრივად ახალ და უფრო მაღალ საფეხურზე გადასვლას. ჩემი გადაწყვეტილება, დავნიშნო ამ მაღალ და უაღრესად საპასუხისმგებლო თანამდებობაზე ქალბატონი ანა დოლიძე, გამაგრებულია პროფესიონალიზმით, სიმამაცით, ღირებულებებისადმი ერთგულებით და ამ ყველაფრით არა თეორიულად, არამედ ბევრი წლის განმავლობაში, რომლის დროსაც ანა დოლიძე ამტკიცებდა თავის უნარს, იყოს უაღრესად კვალიფიციური, მამაცი და ქვეყნის უზენაესი ღირებულებების ერთგული იურისტი. ამითაა განპირობებული ჩემი გადაწყვეტილება მისი დანიშვნის შესახებ“, – განაცხადა მარგველაშვილმა.