ავჭალაში ცოლ-ქმრის მკვლელობაზე შს მინისტრის მოადგილე კომენტარს აკეთებს

შინაგან საქმეთა მინისტრის მოადგილე ნათია მეზვრიშვილი დღეს გამართულ ბრიფინგზე ავჭალაში ცოლ-ქმრის მკვლელობის საქმესაც გამოეხმაურა და განაცხადა, რომ აღნიშნულ საქმეზე საგამოძიებო და ოპერატიული ღონისძიებები გრძელდება.
მისივე თქმით, უკვე დადგენილია და დაკითხულები არიან მეზობლები, ახლობლები, ასევე აღებულია გენეტიკური კვლევის ნიმუშები იმისთვის, რომ დანაშაულის ჩამდენი პირი დადგინდეს, „რაც ძალიან მნიშვნელოვანია საქმის გახსნისთვის“.
„ამ საქმესთან დაკავშირებითაც გამოძიება ინტენსიურ რეჟიმში მიმდინარეობს. აქ გამოძიება მიმდინარეობს დამამძიმებელ გარემოებაში მკვლელობის ფაქტზე და ცეცხლსასროლი იარაღის უკანონო შეძენა-შენახვის ფაქტზე. მოტივთან და დამატებით დეტალებთან დაკავშირებით, როგორც კი გვექნება ინფორმაცია, დამატებით მივაწვდით საზოგადოებას“, – განაცხადა მეზვრიშვილმა.
თბილისში ცოლ-ქმარი ორი დღის წინ მოკლეს. შემთხვევა ზაჰესში მოხდა. როგორც ადგილობრივები აცხადებენ, ცოლ-ქმარი გარდაცვლილი საკუთარ მაღაზიაში იპოვეს. სავარაუდოდ, უცნობმა პირებმა მაღაზიის დაყაჩაღება სცადეს.