ღამის კლუბ „ბასიანის“ დაცვის უფროსი ზვიად მესხი პირველ არხთან საუბრისას 13 იანვრის ინციდენტის დეტალებს იხსენებს.
ზვიად მესხის თქმით, ბრალდებულ ახალგაზრდას კლუბში შესვლაზე უარი უთხრეს, რის შემდეგაც, მან დაცვის სამსახურის წევრებს სიტყვიერი შეურაცხყოფა მიაყენა.
„მოვიდა ორი პირი, რომელთაც კლუბში შესვლა უნდოდათ. მათ უარი განვუმარტეთ. იყვნენ აგრესიულები და ნასვამები. გადმოვიდნენ შეურაცხყოფაზე და გინებაზე, რაზეც ჩვენ რამდენჯერმე მოვუწოდეთ, რომ არ მოეყენებინათ შეურაცხყოფა. გავიყვანეთ ტერიტორიიდან. ადგილზე ბევრი ადამიანი ირეოდა. დიდუბე-ჩუღურეთის სამმართველოს მე-4 განყოფილების უფროსის მოადგილე თამაზ საველიევს ვესაუბრებოდი ამ შექმნილ სიტუაციაზე. დავინახე ბატონი თამაზის ხელის მოძრაობა – ის ხელში დაიჭრა, მე თავში. ასევე, დაიჭრა ჩემი თანამშრომელი არაფრის გამო – იმის გამო, რომ ადამიანს კლუბში უნდოდა შესვლა. თუ შეიძლება ქვეყანაში ადამიანი დაიჭირონ ხელის დარტყმის გამო, რატომ არ შეიძლება, ადამიანს რომ კლავ, მოიხადო, რაც გეკუთვნის“, – აცხადებს ზვიად მესხი.
შეგახსენებთ, რომ ღამის კლუბ „ბასიანთან“ ინციდენტის დროს პოლიციის ერთი თანამშრომელი და კლუბის დაცვის ორი წევრი დაჭრეს. მთავარმა პროკურატურამ 3 ადამიანის დაჭრაში ბრალდებულისთვის აღკვეთის ღონისძიების სახით პატიმრობა მოითხოვა, თუმცა, სასამართლო პროცესზე, თბილისის საქალაქო სასამართლომ ბრალდებულს აღკვეთის ღონისძიების სახით 30 000 ლარის ოდენობით გირაო შეუფარდა.