დღეს ნატო-ს სამხედრო კომიტეტის სხდომაზე საქართველოსა და უკრაინის საკითხებს განიხილავენ. საუბარი შეეხება ორი ქვეყნის, როგორც ნატო-ს პარტნიორების პროგრესს თავდაცვის რეფორმირების სფეროში, ასევე მიმოიხილავენ უსაფრთხოებასთან დაკავშირებით რეგიონში არსებულ ვითარებას. საქართველოსთან დაკავშირებით განიხილება „ნატო-საქართველოს არსებით პაკეტთან“ დაკავშირებული საკითხები.
დღევანდელი სესია უკრაინისა და საქართველოს საკითხების განხილვით გაიხსნება.
“საქართველოს და უკრაინის წარმომადგენლები რეგიონში უსაფრთხოებასთან დაკავშირებით საკუთარ ხედვას მოგვაწვდიან. ასევე განვიხილავთ „ნატო-საქართველოს არსებითი პაკეტისა“ და უკრაინის შეიარაღებული ძალების განვითარების სტატუსთან დაკავშირებით“ საკითხებს“, – აღნიშნა გუშინ კომიტეტის თავმჯდომარემ, გენერალმა პეტრ პაველმა.
გარდა სამხედრო საკითხებისა, საუბარი შეეხება რეფორმებს ისეთ სფეროში, როგორიცაა ეკონომიკა.
„გარდა სამხედრო რეფორმებისა, საქართველომ და უკრაინამ უნდა უზრუნველყონ საიმედო საკანონმდებლო და იურიდიული საფუძველი, ასევე ეკონომიკური პირობები, რომლებიც მხარს დაუჭერენ ეფექტურ სამხედრო შესაძლებლობებს“, – განაცხადა გუშინ შესავალ სიტყვაში პაველმა.