ახლა კრიმინალის გაშუქება გაიზარდა, – ასე პასუხობს საპარლამენტო უმრავლესობის წევრი ლევან გოგიჩაიშვილი ჟურნალისტების კითხვას იმის შესახებ, გაიზარდა თუ არა კრიმინალი.
“თქვენ ახლა ხედავთ გაზრდას? მანამდე არ ხედავდით? ახლა გაიზარდა გაშუქება. ადრე საინფორმაციო საშუალებებში რა თემებიც იყო დაბლოკილი, დღეს, რა თქმა უნდა, არის თავისუფალი, ამიტომ კრიმინალის გაშუქება არის გაზდილი. ეს ბუნებრივია კარგია იქიდან გამომდინარე, რომ საშუალებას აძლევს კონკრეტულ უწყებებს მეტად დაფიქრდნენ და კონკრეტული ნაბიჯები შეიმუშაონ. ალბათ, საზოგადოება რწმუნდება იმ საკითხში, რომ იმ მეთოდებით, რა მეთოდებითაც ოთარ კახიძე და ადეიშვილი მართლწესრიგს ამყარებდნენ საქართველოში, „ქართული ოცნება“ ამ მიმართულებით არ წავა. ჩვენ, ადამიანებს იმის გამო, რომ მომავალში შეიძლება რაღაც დანაშაული ჩაიდინონ, სხვა დანაშუალების გამო ვერ დავიჭერთ, ვერ ჩავუდებთ იარაღს, ნარკოტიკს და რეპრესიას ვერ განვახორციელებთ. ჩვენთვის ახლა მნიშვნელოვანია და მიმდინარეობს რეფორმა საპრევენციო, საპოლიციო მიმართულებით. ასევე გარკვეულწილად ალბათ შს სამინისტრო გააკეთებს განცხადებას და ალბათ იტყვის კიდეც რას გააკეთებს ამასთან მიმართებაში. რა ტონითაც ჩვენ ახლა გვესაუბრება მაგალითად, „ევროპული საქართველო“, ეს მიუღებელია. ისინი ამბობენ – ჩვენ რომ ვიყოთ ხელისუფლებაში, წესრიგს დავამყარებდითო, მათი ბრძოლა კრიმინალთან არის იარაღის, ნარკოტიკის ჩადება, უდანაშაულო ხალხის ყოლა ციხეებში, რეპრესიები – ჩვენ ამას არ გავაკეთებთ“, – განაცხადა ლევან გოგიჩაიშვილმა.