“ადამიანმა თუ არ იცის, ვინ არის მისი მაჟორიტარი, შეიძლება მაჟორიტარი არ დასჭირვებია”

“თუ ადამიანმა არ იცის ვინ არის მისი მაჟორიტარი დეპუტატი, ეს მოწმობს, რომ შეიძლება მას არ ჰქონდა ისეთი პრობლემა, მაჟორიტარი დასჭირვებოდა”,-ამის შესახებ პარლამენტის განათლების, მეცნიერებისა და კულტურის კომიტეტის თავმჯდომარის მოადგილე გუგული მაღრაძემ NDI-ს მიერ ჩატარებული კვლევის საპასუხოდ განაცხადა.
მისივე თქმით, ეს იმასაც შეიძლება მოწმობდეს, რომ მოსახლეობა თავიანთი პრობლემებითაა დაკავებული.
“ამ თვალსაზრისით ძალიან ბევრი ქვეყანაა, სადაც გარკვეულმა რაოდენობამ, ვინც პოლიტიკურად აქტიურია, იცის ვინ არის მისი მაჟორიტარი, მაგრამ მოსახლეობის დანარჩენი ნაწილი თავისი პრობლემებით არის დაკავებული. იგივეა საკონსტიტუციო ცვლილებების შესახებაც. კონსტიტუცია ქვეყნის მთავარი კანონია, მაგრამ იცით, რომ არჩევნებზე მოსული ამომრჩევლის რაოდენობა საშუალოდ 49-50%-ია. ეს მიუთითებს იმაზე, რომ მათ თავიანთი პრობლემები აქვთ და არ აინტერესებთ, ან არ აქვთ იმედი, რომ რაიმე შეიცვლება”,-განაცხადა გუგული მაღრაძემ.