დედაქალაქის მერი კახა კალაძე თბილისის 95-ე ბაგა-ბაღში გაუფრთხილებლად მივიდა, საიდანაც ფეისბუქის პირად გვერდზე პირდაპირ ეთერში ჩაერთო. მან სასადილოში არსებული მდგომარეობა დაათვალიერა და აღნიშნა, რომ ნორმალურ პირობებში მზადდება ყველაფერი.
”ამ წუთში ვიმყოფებით 95-ე ბაგა ბაღში. მე მივიღე გადაწყვეტილება, მოვსულიყავი ერთ-ერთ ბაღში გაფრთხილების გარეშე, რადგან თქვენ იცით, რომ მიზანმიმართულად მიმდინარეობს სიცრუის კამპანია, თითქოს ბაღებში კვების რაციონი არის შემცირებული და ბავშვები არიან საჭმლის გარეშე. ეს არის ძალიან დიდი ტყუილი და სიცრუე”, – განაცხადა კალაძემ.
მისივე თქმით, ერთადერთი, რისი შემცირებაც მოხდა საბავშვო ბაღების მენიუდან, არის შაქარი და მარილი და ესეც განხორციელდა საერთაშორისო სტანდარტების შესაბამისად.
”ჩვენ გამოვაქვეყნეთ ვიდეო, თუ რითი იკვებებიან ბავშვები. თქვენ ხედავთ, თუ როგორი პირობებია აქ სამზარეულოში, სადაც პატარებისთვის საკვები მზადდება. საკვები არის ბავშვებისთვის საკმარისი. ერთადერთი, რისი შემცირებაც მოხდა, არის მარილი და შაქარი ისევ ჩვენი შვილების და პატარების ჯანმრთელობისთვის. სწორი კვება არის განსაკუთრებით მნიშვნელოვანი და ეს გადაწყვეტილება ეფუძნება საერთაშორისო სტანდარტებს. Unisef-ი იყო ჩართული კვების რაციონის შემუშავებაში, თუ როგორია საერთაშორისო სტანდარტი. არანაირი პრობლემა კვებასთან დაკავშირებით არ არსებობს. ხელშეკრულება, რომელიც გაფორმდა კომპანიასთან, არის ერთთვიანი. ტენდერი გამოცხადებულია და ველოდებით ყველა კომპანიას, ვისაც სურს მონაწილეობის მიღება. მინდა ყველა დავაწყნარო და მშობლებს ვუთხრა, რომ არანაირი პრობლემა არ არსებობს კვებასთან დაკავშირებით, თქვენი შვილები იკვებებიან აბსოლუტურად ჯანსაღი პროდუქტებით”, – განაცხადა კალაძემ.