სოსო ქუთათელაძის მკვლელობის გამოძიების ფარგლებში დაკავებული და შემდეგ გათავისუფლებული გიორგი ჭანტურია და მისი და მარიამ ჭანტურია ქვემო ქართლის სამხარეო პოლიციაში განმეორებით დაკითხვაზე იმყოფებიან.
როგორც გიორგი ჭანტურიამ ჟურნალისტებს განუცხადა, არ იცის, კიდევ რა კითხვები ექნებათ გამომძიებლებს. მისი თქმით, არსად გაქცევას არ აპირებდა, ამიტომ გაუგებარია, რატომ დაიბარეს დაკითხვაზე განმეორებით.
გიორგი ჭანტურიასთან ერთად, დაკითხვაზე იმყოფება მისი და მარიამ ჭანტურია. მისი თქმით, გამომძიებლებმა გაუთქმელობის შეთანხმებას მოაწერინეს ხელი, ამიტომ ჩხრეკის დროს ამოღებულ ნივთებზე საჯაროდ ვერ ისაუბრებს.
როგორც მარიამ ჭანტურიამ აღნიშნა, კარგი მოლოდინი აქვს და დარწმუნებულია, რომ თავის ძმას მკვლელობას არ დააბრალებენ. მისივე თქმით, დღეს მამამისის დასაკითხად გამომძიებლები კლინიკაში იმყოფებოდნენ, სადაც ზურაბ ჭანტურია დღეს გადაიყვანეს. თუმცა ჯანმრთელობის მდგომარეობის გამო, ზურაბ ჭანტურიამ გამოძიების შეკითხვებს ვერ უპასუხა.
დღეს სამართალდამცავებმა გიორგი ჭანტურიას ავტომანქანა და რუსთავსა და თბილისში საცხოვრებელი სახლები განმეორებით გაჩხრიკეს. ჭანტურიას საცხოვრებელი სახლიდან გამოსული გამომძიებლის განცხადებით, ბინის განმეორებით ჩხრეკის შედეგად მართლსაწინააღმდეგო ნივთი ამოღებული არ არის, ამოღებულია მხოლოდ სხვადასხვა ნივთები, რომლებიც ექსპერტიზაზე გადაიგზავნება.
შეგახსენებთ, რომ გენერალ სამსონ (სოსო) ქუთათელაძის მკვლელობის გამოძიების ფარგლებში გიორგი ჭანტურია 16 იანვარს დააკავეს. იგი თითქმის 40 საათის განმავლობაში იყო დაკავებული, რის შემდეგაც ქვემო ქართლის პოლიციის დეპარტამენტის შენობა დატოვა. როგორც „ინტერპრესნიუსს“ შს სამინისტროში განუცხადეს, მას მიმდინარე გამოძიებაზე ბრალი არ წარედგინა.