გიორგი ტყემალაძე – მერიის ახალი სატრანსპორტო პოლიტიკა რეალურ შედეგს მოიტანს

თბილისის საკრებულოს თავმჯდომარე გიორგი ტყემალაძე თბილისის სატრანსპორტო სისტემაში დაგეგმილ ცვლილებებს მიესალმება. 
თბილისის საკრებულოს   ცნობით, გიორგი ტყემალაძის თქმით, მერიის ახალი სატრანსპორტო პოლიტიკა რეალურ შედეგს მოიტანს და დედაქალაქი საცობებისგან საგრძნობლად განიტვირთება, რაც თავის მხრივ ქალაქში მავნე გამონაბოლქვის შემცირებას გამოიწვევს.
თბილისის საკრებულოს თავმჯდომარემ დაგეგმილ ცვლილებებზე ვრცლად ისაუბრა და განაცხადა, რომ ტრანსპორტის სფეროში არსებული პრობლემების გადასაჭრელად დედაქალაქის მთავრობა რამდენიმე ეტაპიან სამუშაოებს განახორციელებს. მათ შორის, მოხდება სატრანსპორტო ინფრასტრუქტურის მოწესრიგება, მუნიციპალური ავტოპარკის განახლება და მეტროს რეაბილიტაცია. 
გიორგი ტყემალაძის თქმით, საზოგადოებრივი ტრანსპორტის განვითარება მის ხელმისაწვდომობას გაზრდის და ჩვენი თანამოქალაქეების კიდევ უფრო უსაფრთხო და კომფორტულ გადაადგილებას შეუწყობს ხელს.
გიორგი ტყემალაძის განცხადებით, ასევე, ცვლილებები შევა დასუფთავების, სადისტრიბუციო და სამშენებლო სატვირთო ავტომანქანების გადაადგილების განრიგშიც.
„სატრანსპორტო პოლიტიკით გათვალისწინებული თითოეული ნაბიჯი თბილისის საცობებისგან განტვირთვისკენ და მოსახლეობისთვის გადაადგილების დროს კიდევ უფრო მეტი კომფორტის შექმნისკენ არის მიმართული. ეს ჩვენი თანამოქალაქეების დაკვეთაც და თბილისის მერის და ჩვენი გუნდის წინასაარჩევნო დაპირებაც გახლდათ,“ – განაცხადა გიორგი ტყემალაძემ.
თბილისის საკრებულოს თავმჯდომარის თქმით, კიდევ ერთი სიახლე, რომელიც სატრანსპორტო ნაკადების ეფექტიანი მართვისთვის მნიშვნელოვანია, ტაქსების მომსახურების ხარისხის გაუმჯობესება გახლავთ.
მისივე თქმით, ეტაპობრივად, გარკვეული სტანდარტები დამკვიდრდება. მანამდე კი ტაქსის სერვისის განხორციელებისთვის, ტაქსებისთვის ნებართვის აღება გახდება სავალდებულო. როგორც ტყემალაძემ განმარტა, რეგისტრაცია სავალდებულო იქნება და მძღოლები მის გავლას უფასოდ შეძლებენ. 
გიორგი ტყემალაძემ დედაქალაქის მერიის მიერ შემუშავებულ საკანონმდებლო ცვლილებების პაკეტში, თბილისში ტრანზიტული მოძრაობის წესის დარღვევისთვის ჯარიმის გაზრდასთან დაკავშირებითაც ისაუბრა.
მისი თქმით, დედაქალაქში სატრანზიტო მოძრაობა აკრძალულია, თუმცა ჯარიმის სიმცირის გამო, ხშირია ამ წესის დარღვევა.
ტყემალაძის განმარტებით, დაგეგმილი ცვლილებების თანახმად, აღნიშნული წესის დარღვევისთვის ჯარიმა 500 ლარამდე გაიზრდება, რაც მსგავს შემთხვევებს საგრძნობლად შეამცირებს.
„ჩამოთვლილი ღონისძიებები იმ კომპლექსური პროგრამის ნაწილია, რომელთა განხორციელებასაც სატრანსპორტო სისტემის მიმართულებით იგეგმება. დარწმუნებული ვარ, რომ დედაქალაქის მთავრობა თბილისში თანამედროვე სატრანსპორტო სისტემის დამკვიდრებისთვის ყველაფერს გააკეთებს და აუცილებლად მივაღწევთ იმას, რომ დედაქალაქი საცობებისგან განიტვირთოს,“ – განაცხადა გიორგი ტყემალაძემ.
საკრებულოს თავმჯდომარის თქმით, აღნიშნული ცვლილებები ფინანსთა და შინაგან საქმეთა სამინისტროს, პარლამენტისა და კერძო სექტორის აქტიური ჩართულობით განხორციელდება.