ოპოზიციას მხოლოდ ის დარჩენია, რომ საზოგადოებას შოუს დადგმით დაამახსოვროს თავი, – ამის შესახებ თბილისის საკრებულოს ქონების მართვისა და საფინანსო-საბიუჯეტო კომისიის თავმჯდომარემ ირაკლი ზარქუამ ცინცაძე-კარტოზიას დამაკავშირებელი ესტაკადის საკითხთან დაკავშირებით განაცხადა.
მისი თქმით, აღნიშნული ესტაკადის მშენებლობის ტენდერი ჯერ კიდევ 2016 წელს იყო გამოცხადებული, თუმცა მშენებლობის დასაწყებად ხეების მოჭრა იყო აუცილებელი, რის გამოც მერიამ პროექტი შეაჩერა.
ირაკლი ზარქუას განცხადებით, დედაქალაქის მერიის ახალი ხელმძღვანელობა ტერიტორიის კერძო მესაკუთრესთან ესტაკადის ასაშენებლად მოლაპარაკებებს აწარმოებს. რაც შეეხება ტერიტორიაზე არსებულ ხეებს, ირაკლი ზარქუას თქმით, მათ სხვა ადგილას გადარგავენ.
დეპუტატმა ასევე თბილისის მთავრობის სხდომაზე საკრებულოს ოპოზიციის წარმომადგენლების დასწრებასთან დაკავშირებითაც ისაუბრა. მისი თქმით, საკრებულოს ოპოზიცია არის იმ ადამიანთა ჯგუფი, რომელმაც თბილისის წარმომადგენლობით ორგანოში თავი ვერაფრით გამოიჩინა და ახლა ცდილობს საზოგადოებას შოუს დადგმით დაამახსოვროს თავი.
„მათ აბსურდულ ბრალდებებზე ჩვენ ყოველთვის არგუმენტირებული პასუხები გვაქვს და ამიტომ შოუს დადგმაზე გადავიდნენ. მათ მერიაში მივარდნები დაიწყეს. ეს იყო ღია კარის მტვრევა, რადგან მათთვის თბილისის მთავრობის სხდომაზე დასწრებაში ხელი არავის შეუშლია“, – აღნიშნა ირაკლი ზარქუამ, რომლის კომენტარსაც თბილისის საკრებულოს პრესსამსახური ავრცელებს.
ირაკლი ზარქუა – ოპოზიციას მხოლოდ ის დარჩენია, რომ საზოგადოებას შოუს დადგმით დაამახსოვროს თავი
2018/01/24 16:47:14
კომენტარები
ნანახია: 941 ჯერ