“ბახალას” 30 ათას ლარზე მეტი ღირებულების, 45 აბი „სუბოტექსი“ ჰქონდა, სასამართლომ ყველაზე მინიმალური სასჯელი გამოიტანა”

„ბახალას“ მიმართ სასამართლომ გამოიტანა ყველაზე მინიმალური სასჯელი – რვა წელი – ამის შესახებ „კვირას“ პარლამენტის იურიდიულ საკითხთა კომიტეტის თავმჯდომარის პირველმა მოადგილემ ვანო ზარდიაშვილმა განუცხადა.
როგორც დეპუტატი აცხადებს, ნარკოტიკის ის ოდენობა, რომელიც გიორგი გიორგანაშვილს – „ბახალას“ თან აღმოაჩნდა, საფუძვლიან ეჭვს ბადებს იმის თაობაზე, რომ მხოლოდ პირადი მოხმარებისთვის არ იყო განკუთვნილი. მისი თქმით, საუბარია 30 ათას ლარზე მეტი ღირებულების ნარკოტიკულ საშუალებაზე.
ზარდიაშვილი იზიარებს მოსაზრებას, რომ ნარკოტიკული საშუალებების პირად მოხმარებასთან დაკავშირებული სასჯელების ზომები უნდა გადაიხედოს, თუმცა ამბობს, რომ „გამსაღებლებთან“ მიმართებაში, სახელმწიფოს პოლიტიკა უმკაცრესი იქნება. „ბახალას“ ეპიზოდთან დაკავშირებით ჩვენ ფაქტებით შეგვიძლია ვისაუბროთ – მას ჰქონდა 45 აბი „სუბოტექსი“, რომელიც „შავ ბაზარზე“ 30 ათას ლარზე მეტად არის შეფასებული, რეალურად ბახალას მიმართ სასამართლომ გამოიტანა ყველაზე მინიმალური სასჯელი – რვა წელი, თუ ვინმეს ჰგონია, რომ ქართულ საზოგადოებაში, ქართულ სახელმწიფოში ადამიანი არ დაისჯება 45 აბი “სუბოტექსისთვის”, რომელიც დაახლოებით 400 ადამიანის მოსახმარია, ძალიან ცდება. სახელმწიფო იქნება ძალიან მკაცრი იმათთან მიმართებაში, ვინც მიზნად დაისახავს სხვისი შვილების ნარკოტიკებით მოწამვლას, ასევე თამამად და ხმამაღლა შემიძლია განვაცხადო – დღეს საქართველოში არც ერთი მოქალაქე არ იხდის ტყუილად ან გადამეტებულად სასჯელს, ამის თქმა სრული პასუხისმგებლობით შეიძლება. მოთხოვნები, შეკრებები რომელიც „თეთრი ხმაურის“ ორგანიზებით ხდება, ცალსახად შეიძლება ითქვას, რომ არის პროპაგანდისტული მანქანა, რომელიც მიზნად ისახავს ქართულ საზოგადოებაში ნარკოტიკების ჭარბ მოხმარებას. მინდა, სამართალდამცველებს მოვუწოდო, არ მოექცნენ ამ პროპაგანდის ქვეშ და ხელი არ აუკანკალდეთ ნარკოგამსაღებლების დაკავებისას – იმათი დაკავებისას, რომელთაც ჯიბეში უდევთ 1000 ადამიანის მოსახმარი ნარკოტიკი. სამართალდამცველებს ექნებათ სრული მხარდაჭერა სახელმწიფოსგან იმისთვის, რომ აღიკვეთოს ნარკოტიკების გასაღება ჩვენს ქვეყანაში. ყველა ვთანხმდებით იმაზე, რომ პირადი მოხმარებისთვის ნარკოტიკის შენახვასთან დაკავშირებით, სასჯელები უნდა გადაიხედოს. საკანონმდებლო ცვლილებები რა ფორმითაც უნდა მივიღოთ, იქნება ძალიან ლიბერალური მომხმარებლების მიმართ, თუმცა იქნება დაუნდობელი ნარკოტიკების გამსაღებლებთან მიმართებაში, რაც შეეხება „ბახალას“ შემთხვევას, პროკურატურას ბრალი არ წაუყენებია გასაღებაზე, იმიტომ, რომ ამისი ფაქტობრივი მტკიცებულებები არ არსებობდა, მაგრამ 45 აბი ნარკოტიკი, რომლის ღირებულებაც შავ ბაზარზე დაახლოებით 30 ათასი ლარია, საფუძვლიან ეჭვს ბადებს, რომ მას მხოლოდ პირადი მოხმარებისთვის არ უნდოდა “, – აცხადებს დეპუტატი. ვანო ზარდიაშვილი საგამოძიებო ორგანოებს სრულ ნდობას უცხადებს. „ სრულ ნდობას ვუცხადებ,ქართულ საგამოძიებო ორგანოებს, პოლიციას მით უმეტეს იმ ფონზე, როდესაც ქართული პოლიცია ჩაიბარა ისეთმა მინისტრმა, როგორიც გიორგი გახარიაა, სრულ ნდობას ვუცხადებ ქართულ პროკურატურას, რომლის მიმართაც ქართულ საზოგადოებას არანაირი პრეტენზია არ აქვს ბოლო ოთხი წლის განმავლობაში, შესაბამისად ჩვენ შეგვიძლია ხმამაღლა ვთქვათ, რომ საგამოძიებო მოქმედებები იყო სამართლის ნორმებთან ზედმიწევნით შესაბამისი, ხოლო სასამართლომ მიიღო ის გადაწყვეტილება და მას მიუსაჯა ის მინიმალური სასჯელი, რომელსაც კანონი ითვალისწინებს“, –განაცხადა ვანო ზარდიაშვილმა.
შეგახსენებთ, რომ თბილისის საქალაქო სასამართლომ სრულად გაიზიარა ბრალდების მხარის მიერ წარდგენილი მტკიცებულებები და განსაკუთრებით დიდი ოდენობით ნარკოტიკული საშუალების უკანონოდ შეძენა-შენახვის ფაქტზე, ბრალდებული გიორგი გიორგანაშვილი – „ბახალა“ დამნაშავედ სცნო საქართველოს სისხლის სამართლის კოდექსის 260-ე მუხლის მეექვსე ნაწილის „ა“ ქვეპუნქტით და სასჯელის სახედ 8 წლით თავისუფლების აღკვეთა განუსაზღვრა.