“გამსაღებლების მიმართ მკაცრი უნდა ვიყოთ, მომხმარებლების მიმართ კი ლოიალური”

თუ ვინმე ფიქრობს, რომ 45 აბი სუბოტექსის შემთხვევა ხვალ დასჯადი არ იქნება, ეს მოლოდინი ალბათ არ გამართლდება, ამის შესახებ ფრაქცია „ქართული ოცნების” თავმჯდომარე მამუკა მდინარაძემ მსახიობ გიორგი გიორგანაშვილის საქმეზე საუბრისას განაცხადა.
მისივე განმარტებით, მმართველი გუნდი ორი რადიკალური პოზიციიდან, რომელიც საზოგადოებასა და უმრავლესობაში არსებობს, ყველაზე რაციონალური კომპონენტის ამოღებას ცდილობს.
“გამსაღებლების მიმართ ძალიან მკაცრი უნდა ვიყოთ, ხოლო მომხმარებლების მიმართ ლოიალური და შესაბამისი ცენტრები შევქმნათ, რათა ისინი საზოგადოებას დავუბრუნოთ. რაც შეეხება მსახიობ გიორგი გიორგანაშვილის საქმეს, თუ ვინმე ფიქრობს, რომ 45 აბი სუბოტექსის შემთხვევა ხვალ დასჯადი არ იქნება, ეს მოლოდინი ალბათ არ გამართლდება. ამ საქმეს მეორე მხარე აქვს. თუ ვინმე ამბობს, რომ ეს ადამიანი არაკანონიერად იყო დაკავებული, წინ სასამართლოს ორი ინსტანცია არსებობს და შეუძლიათ, იდავონ. თუ ერთი პროცენტი ეჭვი არსებობს, ნებისმიერ ადამიანს წარმატებას ვუსურვებ”, – განაცხადა მდინარაძემ.