პრეზიდენტი მარგველაშვილი არ იძლევა საშუალებას, პოლიტიკური დაპირისპირება თავიდან ავიცილოთ, – ამის შესახებ ფრაქცია „ქართული ოცნების“ თავმჯდომარე მამუკა მდინარაძემ დღეს გამართულ პრესკონფერენციაზე განაცხადა, სადაც მან საქართველოს პრეზიდენტი გირგვლიანის საქმეზე ექს-პრეზიდენტ მიხეილ სააკაშვილთან ტანდემში საუბარში დაადანაშაულა.
„ჩვენ ვფიქრობთ, რომ ეს უფრო არის პოლიტიკური ხმაშეწყობა, სადაც მარგველაშვილი ცდილობს და მისი პოლიტიკური ამოცანაა, რამენაირად გამოიყვანოს იმ თავხედობიდან, იმ დანაშაულიდან, რაც მიშა სააკაშვილმა წინა პერიოდში ჩაიდინა. მთელი შარშანდელი წლის განმავლობაში ისინი თავიანთი უზრდელობით ცდილობდნენ, არგუმენტებზე მსჯელობა რამენაირად პოლიტიკურ დაპირისპირებაში გადაეყვანათ. როდესაც პარლამენტის თავმჯდომარე რამდენიმე დღის წინაც საზოგადოებრივ მაუწყებელთან დაკავშირებულ კანონზე განმარტებებს და არგუმენტებს ითხოვდა, მათ უპასუხეს უზრდელობით და არ შევიდნენ დისკუსიაში არგუმენტებთან დაკავშირებით. ჩვენ კორექტულები ვიყავით და შევეცდებით ასევე ვიყოთ მომავალშიც. ეს არის ჩვენი პოლიტიკური ნება, მაგრამ იმის საშუალებას, რომ პოლიტიკურია დაპირისპირება ავიცილოთ, პრეზიდენტი მარგველაშვილი არ იძლევა“, – აღნიშნა მდინარაძემ.