ფონდ „იავნანას“ დამფუძნებელს, პაატა ბურჭულაძეს სასამართლოში 9 თებერვალს დაკითხავენ. ინფორმაციას 1tv ბურჭულაძის ადვოკატის, სოსო ბარათაშვილის კომენტარზე დაყრდნობით ავრცელებს.
მთავარმა პროკურატურამ ფონდ „იავნანას“ ხელმძღვანელი პირების მიერ დიდი ოდენობით თანხების შესაძლო მითვისება-გაფლანგვის ფაქტზე გამოძიება 20 სექტემბერს დაიწყო.
პროკურატურის ცნობით, გამოძიების დაწყებას საფუძვლად დაედო არასამთავრობო ორგანიზაცია „ახალგაზრდა ფინანსისტთა და ბიზნესმენთა ასოციაციის“ ვიცეპრეზიდენტის განცხადება, რომელშიც განმცხადებელი მიუთითებდა, რომ ფონდ “იავნანას” ხელმძღვანელი პირები შესაძლოა საქველმოქმედო მიზნებისათვის მოპოვებულ თანხებს არამიზნობრივად ხარჯავდნენ.
პაატა ბურჭულაძემ 2015 წლის ნოემბერში დააფუძნა ორგანიზაცია “საქართველოს განვითარების ფონდი”, რომლის დეკლარირებული მიზანი იყო “ქვეყნისთვის აქტუალური საკითხების განხილვა და სახელმწიფოებრივად მოაზროვნე დემოკრატიული ძალების კონსოლიდაცია”. 2016 წლის საპარლამენტო არჩევნების წინ მან პოლიტიკური მოძრაობა “სახელმწიფო ხალხისთვის” შექმნა, თუმცა მისმა მოძრაობამ საარჩევნო ბარიერი ვერ გადალახა, რის შემდეგაც ოპერის მომღერალმა ჯერ პარტია, შემდეგ კი საქართველო დატოვა. 9 სექტემბერს ის რუსეთში მიხაილოვსკის თეატრის სამხატვრო ხელმძღვანელად დაინიშნა.
წყარო:იმედინიუსი