საპარლამენტო უმრავლესობის დეპუტატი ნინო წილოსანი სოციალურ ქსელში, მისი ოჯახის მიმართ გაჟღერებულ ბრალდებებს პასუხობს.
“ვატყობ დიდ ინტერესს იწვევს ჩემი პოსტები და ჩემი ოჯახის შესახებ ინფორმაცია.
იქნებ იმითაც დაინტერესდეს საზოგადოება, წინა ხელისუფლების დროს როგორ დაიჭირეს მამაჩემი და ქარხნის 51 % ციხეში როგორ გადააფორმებინეს. მერე,სააკაშვილის უშუალო ბრძანებით, ქარხანა „თ.ჯ. თრეიდს“ მიყიდეს, რომელმაც 3 წლის თავზე კომპანია 73 მილიონი ლარით გაკოტრებამდე მიიყვანა. იქნებ იმაზეც გვესაუბრა, როგორ აშენებდა ამის პარალელურად ბადრი წილოსანი რუსთავში ახალ ვაგონმშენებელ ქარხანას. ნულიდან, წვალებით და ამ საქმისთვის თავგადადებული ხალხის გვერდით დგომით… ბევრს იცნობთ ისეთ ადამიანს, წარმოებაზე თავგადაკლულებს, ერთი თეთრიც რომ სახელმწიფო დახმარება არ მიუღია?! მამაა და სუბიექტური ვარ, რა თქმა უნდა, მაგრამ ობიექტურად ნამდვილად არ ვიცნობ მისნაირ შრომისმოყვარე, საქმისთვის თავდადებულ და პატრიოტ ადამიანებს. მე ვამაყობ იმით, რომ ბადრი წილოსანის შვილი ვარ! ამასთანავე მზად ვარ დეტალურად, საბუთებით დავადასტურო კონკრეტული ფაქტები:
1. წილის ციხეში გადაფორმება
2. ქარხნის თ.ჯ. თრეიდზე პირდაპირი მიყიდვის საბუთი
3. ავთანდილ საყვარელიძის ხელმძღვანელობით (ამ პერიოდში თავმჯდომარეობდა ქარხნის სამეთვალყურეო საბჭოს) ქარხნის 73 მილიონით გაკოტრებამდე მიყვანის საბუთები… და არა მარტო ეს! რაც შეეხება 45 თუ 65 მილიონის დავას (ორივე რიცხვმა გაიჟღერა აგორებული შავი პიარ კამპანიის დროს, რატომღაც ერთ რიცხვზე ვერ შეჯერდნენ), ვფიქრობდი, სასამართლო გადაწყვეტილებას დავლოდებოდი, მაგრამ ვინაიდან, ვნებათაღელვა არ წყდება, დაინტერესებულ პირებს, კომპანია სთავაზობს საქმის საჯარო მედია განხილვას, საბუთებით და მყარი არგუმენტებით. ყველაზე რთული იმ ბრალდებების მოსმენაა, რომელშიც არათუ დამნაშავე ხარ, არამედ დაზარალებული…
თუ მხოლოდ ცილისწამება არ არის შენი მიზანი, მაშინ გაარკვიე სიმართლე”, – წერს ნინო წილოსანი.