გარიგებულ მატჩებში ბრალდებული კალათბურთის მწვრთვნელები და მსაჯი პატიმრობაში რჩებიან. სასამართლომ არ დააკმაყოფილა დაცვის მხარის შუამდგომლობა და ბრალდებულის მიმართ გამოყენებული აღკვეთის ღონისძიების სახით პატიმრობა ძალაში დატოვა.
დაცვის მხარე საკალათბურთო კლუბ ”სოხუმის” მწვრთნელის ვაჟა კვარაცხელიას, კლუბის თანამფლობელის თემურ დათიკაშვილისა და მსაჯის ზაზა მაჩალაძის გირაოს საფუძველზე გათავისუფლებას ითხოვდნენ. მათ ასევე თავდებში უდგებოდნენ კალათბურთის სამყაროს წარმომადგენლები, მათ შორის ანატოლი ბოისა, კახა შენგელია და ჯამლეტ ხუხაშვილი. ამასთან, დაცვის მხარემ უდაოდ გახადა ბრალდების მიერ მოპოვებული მრკიცებულებები, გარდა ბრალის დადგენილებისა.
დაცვის მხარის შუამდგომლობას არ დაეთანხმა პროკურორი და აღნიშნა, რომ მიუხედავად მტკიცებულებების უდაოდ გახდომისა, კვლავ არსებობს მიმალვისა და დანაშაულებრივი საქმიანობის გაგრძელების საფრთხე. საბოლოოდ მოსამართლემ არ გაიზიარა დაცვის მხარის შუამდგომლობა და ბრალდებულები თემურ დათიკაშვილი, ვაჟა კვარაცხელია და ზაზა მაჩალაძე პატიმრობაში დატოვა.