ძალიან კარგია, რომ მიხეილ სააკაშვილი პოლონეთშია, რადგან დასრულდება ის სრულიად სამარცხვინო სპეკულაცია საქართველოში ექსტრადიციასთან დაკავშირებით და ეს თემა თეორიულადაც გამოირიცხა, – ამის შესახებ „ევროპული საქართველოს“ გენერალურმა მდივანმა გიგი უგულავამ „პალიტრანიუსის“ გადაცემაში „360 გრადუსი“ საუბრისას განაცხადა.
„პოლონეთი არის ევროკავშირის წევრი ქვეყანა, პატივს სცემს ადამიანის უფლებებს, კანონის უზენაესობა ამ ქვეყანაში დაცულია და სააკაშვილის ციხის საფრთხე აღარ არსებობს. ალბათ იქიდან შეძლებს ჩვეულებრივ პოლიტიკურ საქმიანობას“, – აღნიშნა გიგი უგულავამ.
მან მიხეილ სააკაშვილის მხრიდან უკრაინის მოქალაქობის მიღების საკითხს შეცდომა უწოდა და მისთვის მოქალაქეობის ჩამორთმევის კონტექსტში უკრაინის პრეზიდენტი პეტრო პოროშენკოც გააკრიტიკა.
„მიხეილ სააკაშვილის მხრიდან თავის დროზე უკრაინის მოქალაქეობის მიღება არასწორი ქმედება იყო. ეს მიშას უდავო შეცდომა იყო. ამ შეცდომამ სპირალურად მიიყვანა იქამდე, სადამდეც მიიყვანა, მაგრამ ეს არ ნიშნავს იმას, რომ პოროშენკოს გადაწყვეტილება იყო მართებული მოქალაქეობის შეჩერებასთან დაკავშირებით“, – განაცხადა გიგი უგულავამ.