“ვარკეთილის” მეტროში სამუშაოები ექსპერტიზის გარეშე განხორციელდა

კახა კალაძემ მერიის სატრანსპორტო კომპანიას იმ თანამშრომლების გათავისუფლებისკენ მოუწოდა, რომლებიც მეტრო „ვარკეთილის“ სარეაბილიტაციო სამუშაოებში იღებდნენ მონაწილეობას. ამის შესახებ თბილისის მერმა მთავრობის დღევანდელ სხდომაზე განაცხადა.
„როგორც ვიცით რამდენიმე დღის წინ მეტრო „ვარკეთილში“ ჩამოინგრა ჭერი, აღნიშნულ საკითხთან დაკავშირებით ჩვენს მიერ შესაწავლილი იქნა გარემოებები და აშკარაა ის, რომ დაწყებული საპროექტო სამუშაოების შესყიდვებიდან, დამთავრებული სამშენებლო სამუშაოების წარმოების პროცესით, იყო ხარვეზები სამუშაოების შესრულების დროს. კერძოდ, საპროექტო სამუშაოების მიღება-ჩაბარება განხორციელდა ტექნიკური ექსპერტიზის გარეშე, როდესაც მოთხოვნილი იყო ტექნიკური ექსპერტიზის აუცილებლობა. ჩვენ ვიცით, რომ ამ მიმართულებით დაწყებულია გამოძიება და დაველოდოთ შედეგებს, თუმცა, მანამდე მინდა სატრანსპორტო კომპანიის ხელმძღავნელს, მამუკა კობახიძეს დავავალო, რომ დაუყოვნებლივ გაათავისუფლოს დაკავებული პოზიციებიდან ის ადამიანები, რომლებიც ჩართულები იყვნენ სატენდერო პროცედურებში“, – განაცხადა კახა კალაძემ.